2 timoteo - eBible.org

2 TIMOTEO 1:1
1
2 TIMOTEO 1:6
2 TIMOTEO
Puráca'aloji San Pablo huacára'acare piño Timotéojlo marí:
Pablo nucá. Jesucristo huacára'acarena naquiyana
caja nucá. Marí que Tupana huátaca nu'umacá. Rihuacára'a nucá, nu'umacáloje Tupana i'imataca ina'uqué
capichácajo liyá yucuna ajopánajlo penaje. Jesucristo
chojé i'imacana aú iná i'imajica matajnaco je'echú chu; rimacá rinacu i'imacá que, iná i'imajica rejo. 2 Nuhuacára'a
pijló marí puráca'aloji. Iqui'ija nuhuátacare picá, Timoteo. Huara'apá huani Tupana; Huahuacára'ajeri huani
caja Jesucristo. Nuhuata pi'imacá palá napalamane
aú ilérohua. Nuhuata caja Tupana, Jesucristo hua'até
hue'epica pimu'ují. Nuhuata caja nala'acá pipechu palá.
1
Palá Tupana la'acá Pablo yucuna marí:
Tupana hua'até nupura'acó quehuá nupura'acó
pinacu. “Palá pila'acá nucá” que numacá rijló. Rijhua'até
sápajeri nucá. Palani nacaje nupechu nacú i'imacare
ejé nula'á rijló nacaje. Nuchi'inami chuna la'ajícano
que caja nula'acá. 4 Nuhue'epí pipechu la'acó camu'ují
nujhua'até hua'apaque paliyácaca huacajé. Picá iyari
nu'umacá rihuacajé. Chuhua íqui'ija huani nuhuátaca
pichaje i'ijnacana, pu'ují nupechu i'imacáloje raú penaje.
5 Nuhue'epí quehuaca pipechu caphí Tupana chojé.
Pitucumá paló Eunice, pirú Loida, quele pechu i'imari
caphí richojé. Nuhue'epí napechu que caja pipechu
Tupana chojé caphí.
6 Ñaqué i'imacale numá pijló marí que: Noto'otá
nuyáte'ela pinacojé i'imacá. Raú Tupana a'arí pijló
hue'epícaje, pila'acáloje nacaje rihuátaca que raú penaje.
3
2 TIMOTEO 1:7
2
2 TIMOTEO 1:12
Me'etení pila'acá queja pila'ajica; pácho'oniyo richiyá.
7 Tupana a'arí huajló Ripechu. Ripechu ja'apiyá i'imacana
aú huahuata Tupana íqui'ija ajopana ina'uqué hua'até.
Raú caja huapechu i'imá caphí. Uncá ra'alá huajló
Ripechu, huaquero'ocóloje raú penaje. Ripechu aú caja
iná pala'atá iná péchuhua, iná la'acá piyá pu'uhuaré iná
huátaca que huani.
8 Ñaqué i'imacale papáña'aniyo Jesucristo yucuna
i'imacana ja'apí. Papáña'aniyo caja no'opí. Ina'uqué
huajáquelana chu nucá me'etení, noma'acale Jesucristo
ja'apiyá. Tupana i'imatari ina'uqué capichácajo liyá.
Riyucuna i'imacana jimaje ne'iyajena la'añó chapú iná.
Rijimaje caja nala'ajé picá chapú. Eco pijña'á panacu ricá
a'ajná Tupana a'ajica piñaté ejená.
9 Tupana
i'imatari huecá capichácajo liyá,
hue'emacáloje rile'ejena ina'uqué raú penaje,
huahue'epícaloje huatucumó rihuátaca que la'acana
penaje. Uncá na calé huala'á i'imacá, ri'imatácaloje huecá
capichácajo liyá penaje. Jesucristo palamane aú ja calé
ri'imatá huecá richiyá. Caja queja Tupana pechu nacú
huala'acana i'imacá, íqui'ija huani rihuátacale huecá.
Uncá chiyó riqueño'ó eja'ahuá la'acana, hue'emá ripechu
nacú. 10 Caja chuhua huahue'epí rihuajhuénaca huecá,
rihuacára'acale Jesucristo majó i'imacá hue'ematájeri
penaje. Jesucristo chá'atari taca'acaje i'imacá. Tupana
i'imatari ina'uqué capichácajo liyá Jesucristo palamane
aú, iná i'imacáloje matajnaco rijhua'até je'echú chu
penaje. Riyucuna jema'acana aú iná hue'epí rinacojé.
11 Aú calé Tupana huacára'ari nucá, nu'umacáloje
riyucuna ajopánajlo penaje. Ra'á caja nucá Jesucristo
huacára'acarena naquiyana penaje, nohuíña'atacaloje
ajopana rinacu penaje. Uncá judíona calé necá nohuíña'atacarena. 12 Rijimaje nala'á nucá chapú me'etení.
2 TIMOTEO 1:13
3
2 TIMOTEO 2:2
E'iyonaja calé uncá nopáña'alo raú, caphí nupechu
i'imacale Tupana chojé. Caja nuyurí nocó rijló. Aú calé
nuhue'epí palá ra'acá rinacojó nucá. A'ajná nu'umajica
rijhua'até huacajé ejená ra'ajica nucá rinacojó.
13 Palá nohuíña'ataca pi'imacá.
Quehuácaje
ripuráca'alo, nohuíña'atacare nacú picá. Pi'ihuapato
richá, caja queja pipechu i'imacáloje caphí Tupana chojé
raú penaje. Iqui'ija Tupana huátacarena huecá, Jesucristo
hua'atéjena hue'emacale. 14 Tupana a'arí pijló Ripechu
piñaté a'ajeri penaje, pila'acáloje raú Tupana quemacá
pijló que penaje.
15 Maare nujhua'até Asia te'eré eyájena i'imaño i'imacá.
Caja pihue'epí méqueca na'apáñaca nu'umacá piyuque.
Figelo, Hermógenes, quele ja'apáñaño caja nu'umacá najhua'até. 16 Nuhuata Tupana la'acá palá huani Onesíforo,
riyajalo, riyani, quele. Pulapeno que ripala'ataca nupechu. Ina'uqué huajáquelana chu nu'umacá. E'iyonaja
uncá rapáña'alo no'opí. 17 Uncá huani rapáña'alo no'opí
i'imacá. Roma ejo riphaca huacajé, riculá nu'umacá
a'ajná riphátaca nucá ejená. 18 Efeso ejo hue'emaqué
huacajé rila'á piño huecá palá, pihue'epícare caja. Marí
que rila'acale nucá palá, nuhuata Tupana la'ajica ricá
palá huani, je'echú chu ri'imajica huacajé. Re Jesucristo
quemajeri piyuqueja ina'uqué nacú méqueca rijló nacaje
nala'acare marí eja'ahuá chu ne'emacá quetana.
2
Iná i'imacáloje palani Jesucristo hua'até sápajeri penaje
yucuna marí:
1 Nu'urí que nojló picá,
Timoteo, Jesucristo
palamane huecá.
Ñaquele pipechu i'imá caphí,
ripalamane pi'imacale. 2 Capinaca pi'imajica nujhua'até
nohuíña'atajica cajrú ina'uqué huacajé. Nupuráca'alo
2 TIMOTEO 2:3
4
2 TIMOTEO 2:9
pema'acare i'imacá rihuacajé, nacú pehuíña'ataje
ajopana achiñana, na'apátachi riyucuna ajopánajlo.
Marí que i'imacaño pehuíña'ataje: achiñana, caliyáruna,
hue'epiño caja ina'uqué jehuíña'atacana necá. Marí que
i'imacaño pehuíña'ataje rinacu, na'apátacaloje riyucuna
ajopánajlo penaje.
3 Surárana ña'añó chapú caje panacu, nema'acale
nahuacára'ajeri ja'apiyá. Ñaqué caja pijña'acá chapú caje
yajhué panacu, pema'acale Jesucristo, pihuacára'ajeri
ja'apiyá. 4 Uncá surárana la'alá nasápaca'ala nañacajela
ehuá. Rihuacára'ajeri quemacá rijló queja rila'acá nacaje
piyuque. 5 Ñaqué caja bola nacú cátajeñojlo ricá. Uncá
na'alá najló nachá'ataca huemí, uncachu nacátalo namájeri quemacá que. Ñaqué caja pijló ricá. Pila'á richuhuano
nacaje pihuacára'ajeri quemacá que. 6 Re ca'ajná apú.
Camenane ricá; risapa rimena e'iyá, a'ajnejí i'imacáloje
rijluhua penaje. Cachuhua nacuhuaja nacaje tahuá'aro
rijló re'iyá. Riphaca rená chojé huacajé ri'ijná a'ajnejí
ña'ajé rijluhua pamineco. Quéchami ajopana i'ijnacá najluhua rijña'ajé. Ñaqué caja pijló ricá. Pila'aniya tu'ujné
picó, palani nacaje Tupana a'ajícare pijló yurícoloje pijló
penaje. 7 Pi'ijnatá pipéchuhua numacare nacú pijló. Jesucristo la'ajeri palá pipechu, pihue'epícaloje ricá penaje.
8 Pihue'epí méqueca Jesucristo i'imacá. Ne'emacánami
chu, Davidmi chu, laquemi ri'imacá marí eja'ahuá chu.
Ritaca'á i'imacá. Ejomi rimacápo'o piño. Jesucristo
yucuna nu'umá ina'uquejlo. Méqueca Tupana i'imataca
ina'uqué capichácajo liyá yucuna nu'umá najló no'opaca
ehuá. 9 Nujña'á chapú caje panacu me'etení, nu'umacale
riyucuna ajopánajlo. Caja jepo'oqueja nucá curete aú
no'onapitá naquiyá, nu'umá naquiyá, quele hua'ató.
Uncá ina'uquélari que huani nala'acá nucá. E'iyonaja
uncá meque nala'alá, ajopana ina'uqué jema'acá piyá
2 TIMOTEO 2:10
5
2 TIMOTEO 2:17
Tupana puráca'alo. 10 Tupana i'ihuapari rijluhua ina'uqué
naquiyana ajopana e'iyayá, ne'emacóloje capichácajo
liyá penaje.
Jesucristo hua'atéjena ne'emacale,
ne'emajó capichácajo liyá. Palá huani rila'acá ina'uqué,
ne'emacáloje matajnaco je'echú chu raú penaje. Marí
que ri'imacáloje najló penaje, nu'umá Jesucristo yucuna
najló. Rijimaje nujña'á chapú caje panacu. 11 Marí
puráca'aloji numacare nacú quehuaca ricá: Huataca'ajica
ee rihuátaca que la'acana nacú, hue'emajé piño rijhua'até
je'echú chu. 12 Me'etenija calé huajña'á chapú caje yajhué
panacu. Eyá rejo, je'echú chu, hue'emajé rijhua'até
huacára'ajeño. Huamicho'otájica ee richaya maare,
ñaqué caja rimicho'otájica huachaya rejo. 13 Uncá ca'ajná
huala'alá piyuqueja nacaje Tupana huacára'aca que.
E'iyonaja rimacá chuhuá rila'á huanacu palá rimacá que.
Uncá meño'ojó Tupana la'alá apojó rimacare nacú liyá.
Tupana hua'até sápajeri yucuna marí:
pimá piño pijhua'atéjenajlo, Tupana ijlú chuhuá
que pimacá najló, naca'ácaco piyá pajhua'atéchaca
majopéjari puráca'aloji jimaje. Uncá na penaje calé
aca'ácacajo. Rapichátaja rema'ajeño pechu. 15 Pila'á
pipechu locópa'alaja, pi'imacáloje Tupana hua'até
sápajeri palá penaje. Ratá'acare sápacaje aú penájemi
picá.
Ñaquele uncá papáña'alo nacaje pila'acare
ja'apí. Pehuíña'o caja palá Tupana puráca'alo nacú,
pehuíña'atacaloje ina'uqué rinacu palá raú penaje.
16 Pipura'aniyo ajopana hua'até majopéjari puráca'aloji
nacú. Uncá na penaje calé ricá pijló. Uncá caja Tupana
liyaje calé ricá. Ilé caje puráca'aloji jema'acana aú
iná jácho'o Tupana puráca'alo chiyá richaje, richaje
que. 17 Che'erá apíro'otaca iná napona naquiyá iná;
riña'ataco que caja iná jácho'oco Tupana puráca'alo
14 Eco
2 TIMOTEO 2:18
6
2 TIMOTEO 2:22
chiyá. Huejápajano, huejápajano que iná jácho'oco
richiyá, iná jema'acá pachá na'apiyá. Himeneo, Fileto,
quele jehuíña'ataño necá rinacu. 18 Caja nayurí naliyó
quehuácaje puráca'aloji ja'apiyá i'imacana. Marí que
nemacá ina'uqué nacú: “Caja ina'uqué caja taca'acaño
macápo'oño i'imacá.” Marí caje aú napichata ne'iyajena
pechu, napechu i'imacá piyá caphí Jesucristo chojé.
19 Uncá na calé apiyácajeri nacaje Tupana quemacare
nacú. Rimacá rinacu queja ri'imajica. Marí que rimacá
i'imacá:
—Huahuacára'ajeri Tupana, hue'epiri mecajenaca
ina'uqué rile'ejena huani.
Rimá piño marí que:
—Piyuque Jesucristo ja'apiyá i'imacaño yuriño naliyó
pu'uhuaré la'acana.
20 Pají ñópo'ojlo chu re cajrú nacaje piyuqueja. Re
huánija nacaje richu: chiyela, paratú, i'ichilá, caje macá
richu. Re caja nacaje oro naquiyá la'acanami ca'ajná,
sereni naquiyá la'acanami ca'ajná richu. Re caja richu
nacaje pucapé naquiyá ipucánami. Re caja richu nacaje
mirapehua naquiyá la'acanami caje. Re caja richu i'ichí,
iná aco'ocare chojé juni hue'echú ca'alá queja. Re caja
richu chiyela palá lamá'atacanami, naco'ocáloje nacaje
jalá richojé nachaje i'ijnacáñojlo penaje. Ricá penájeja
calé paminá huátari palani chiyela. 21 Ñaqué huajló ricá.
Iná ca'á piyuque pu'uhuaré iná la'acare iná naquiyó. Raú
palani iná Tupánajlo, rihuacára'acaloje iná la'acá nacaje
palani rijló penaje. Ilé chiyela i'imacá paminajlo que caja
iná i'imacá rijló raú.
22 Hualijímaca jo'ó picá. Hualijímaca iná i'imacachu,
huechi iná la'acá iná manaicho. Ñaqué caja iná la'acá
pu'uhuaré. Pila'aniya huani ñaqué. Pipechu i'imá caphí
Tupana chojé. Pihuata íqui'ija ricá ajopana ina'uqué
2 TIMOTEO 2:23
7
2 TIMOTEO 3:2
hua'até. Pipechu i'imá caja palá. Pica'á piliyó quele
cahuíla'ari pinacu. Marí que pi'imajica ajopana Tupana ja'apiyá jema'ajeño hua'até. Rijhua'até pura'ajeño
necá. Caja Tupana ca'arí nanaquiyá pu'uhuaré nala'acare.
Ñaquele napura'ó Tupana hua'até, ra'acáloje nañaté palá
la'acana aú penaje. 23 Pa'aniya caja pinacojó pajlácaje
puráca'aloji. Ilé caje puráca'aloji jimaje naca'ácaco pajhua'atéchaca. 24 Uncá Tupana hua'até sápajeri i'imalá
aca'ácacajo nacú. Palaja ri'imacá ina'uqué hua'até pajimato; rehuíña'ata ina'uqué palá; uncá caja riyúcha'alo
quiñaja. Marí que rijhua'até sápajeri i'imacá. 25 Tupana
hua'até sápajeri quemari caja uncá jema'alaño Tupana
ja'apiyajlo, nala'acáloje palá penaje. Palá rimacá najló,
uncá yurí calé. Marí caje aú ca'ajná Tupana a'arí nañaté,
napajno'otácaloje napéchuhua Tupana ejo, pu'uhuaré
nala'acare liyá. Ne'emacáloje reyá a'ajná ño'ojó quehuácaje puráca'aloji ja'apiyá penaje iná pura'ó najhua'até.
26 Nala'ajica ee quehuaca ricá, nayureje naliyó Jiñá
Chi'ináricana huátaca que la'acana. Caja rile'ejena necá
me'etení. Ñaquele nala'á rihuátaca que. Nácho'ocoloje
richiyá penaje iná i'imá najló Tupana puráca'alo yucuna.
3
Méqueca ina'uqué la'ajica caja penaje huacajé yucuna
marí:
1 Pema'á marí: Ina'uqué amájeño chapú caje yajhué
eja'ahuá iphájica ee rená chojé caja penaje huacajé. 2 Marí
cajena ina'uqué i'imajeño rihuacajé: caí hue'epícaño
nanacuhuá i'imajeño cajrú rihuacajé. Liñeru i'imajeri
caja nahuajhué huani. Napura'ajó caja nanacuhuaja palá;
eyá ajopana nacú napura'ajó pu'uhuaré. Uncá caja nayani
jema'alájeño nachi'iná ja'apiyá. Uncá caja ina'uqué
quemalájeño: “Palá pila'acá huecá” que Tupánajlo.
2 TIMOTEO 3:3
8
2 TIMOTEO 3:9
Uncá caja nahue'epílaje: “Palá pila'acá huecá” que
quemacana palá la'acaño necajlo. Uncá caja nephálaje
Tupana puráca'alo ja'apí. 3 Uncá caja nahue'epílaje
caí ina'uqué nacú; uncá caja nahue'epílaje ina'uqué
mu'ují. Cajrú caja nachapújra'ajico panacuhuácaca.
Uncá huani meño'ojó naca'alá namanaicho nanaquiyó.
Chapú huani caja nala'ajica ajopana ina'uqué. Uncá
4 Nemaje caja
huani nahuátalaje palá la'acaño.
nanaquiyana nacú ajopana ina'uquejlo, nala'acáloje
necá chapú penaje. Mapechúhua'aca caja nala'ajica
nacaje. Nanacuhuaja calé napura'ajó caja palá. Nala'ajé
caja necó hue'epiño que huani. Pu'ují napechu la'ajona
que najló pu'uhuaré la'acana, namanaicho la'acana.
Ricaja calé nahue'epeje caja natucumó. Rilanaquiya
uncá nahuátalaje Tupana. 5 Napura'ajó Tupana nacú;
majopeja ne'emajica ajopánajlo riyucuna. E'iyonaja uncá
nayurílaje nachó rijló, rica'acáloje nanaquiyá pu'uhuaré
nala'acare, ne'emacáloje palá la'acaño raú penaje.
6 Pi'imaniya ilé cajena ina'uqué hua'até numacare nacú
pijló. Ne'iyajena i'ijnaño ajopana ñacaré chojé, ajopana
ñacaré chojé que, napajlácaloje inaana hua'até penaje.
Uncá caphí calé péchuruna inaana hua'até napajlá. Cajrú
namanaicho la'acaño necá inaana. Cajrú nacaje majopéjari amátari necá. 7 Cajena inaana huátaño ajopana
puráca'alo, ajopana puráca'alo que jema'acana. E'iyonaja
napechu je'eló quehuácaje puráca'aloji ja'apejé. Necá
cajena hua'até napajlá. 8 Júpimi Janesmi chu, Jambresmi
chu, quele uncá huani huátalaño Moisesmi chu i'imacá.
Ñaqué caja necá queleruna ina'uqué numacárena nacú
pijló: Uncá huani nahuátala quehuácaje puráca'aloji
ja'apiyá i'imacana. Uncá nehuíla'aru sápala palá najló
rinacu. Caja nayurí naliyó Tupana puráca'alo ja'apiyá
i'imacana. 9 Uncá ne'emalaje ñaqueja riyucuna i'imacana
2 TIMOTEO 3:10
9
2 TIMOTEO 3:14
nacú. Mequetana i'imajémija ina'uqué hue'epéjeño
mecajenaca necá. Nahue'epeje mapéchuruna necá. Marí
que caja namaca Janesmi chu, Jambremi chu hua'até
i'imacá. Uncá huátalaño Moisesmi chu ne'emacá.
10 Caja pila'á palá nohuíña'ataca pi'imacá que. Nupechu
que caja pipechu me'etení. Nula'acá que caja pi'ijnataca
nópumi chu ricá. Nacaje nuhue'epícare la'acana nutucumó que caja pihue'epica pitucumó nacaje la'acana.
Caphí nupechu Tupana chojé. Nupechu que caja pipechu
i'imacá caphí Tupana chojé. Uncá nupechu i'imalá
ujhuí Tupana nacú; ñaqué caja picá. Uncá caja pipechu
i'imalá ujhuí Tupana nacú. Uncá caja nula'alá ujhuí
nuliyó ajopana ina'uqué. Ñaqué caja picá, uncá caja
pila'alá ujhuí piliyó necá. Iqui'ija nuhuátaca Tupana,
ajopana ina'uqué hua'até. Ñaqué caja pihuátaca íqui'ija
Tupana, ajopana ina'uqué hua'até. Cahuajhueni nucá
Tupana sápaca'ala la'acana nacú; cahuajhueni caja picá
rinacú. 11 Nala'á nucá chapú, noma'acale Jesucristo
ja'apiyá. Ñaqué caja nala'acá picá chapú. Nujña'á caja
chapú caje yajhué yajhué panacu. Caja pihue'epí méqueca
nala'acá nucá chapú huani i'imacá, pajimila Antioquía
e nu'umaqué huacajé. Ñaqué caja nala'acá nu'umacá,
Iconio e, Listra e nu'umaqué huacajé. Chapú nala'acá
nucá rehuá i'imacá. E'iyonaja calé Tupana i'imatari
nucá naliyá. 12 Marí queja ricá: Iná hue'epícachu iná
tucumó Jesucristo huátaca que la'acana, ajopana ina'uqué
la'añó iná chapú. 13 Pu'uhuaré la'ajeño la'añó richájeno que huani pu'uhuaré. Ñaqué caja pajlácachina
pajlaca richájeno que huani pajhua'atéchaca. Napajlá caja
ajopana ina'uqué hua'até; nema'á caja pajlácaje na'apiyá.
14 Pijló numá, piyuríniya quehuácaje puráca'aloji ja'apiyá
jema'acana. Caja nehuíña'ata picá rinacu i'imacá. Pihue'epí caja mecajenaca jehuíña'ataño pi'imacá; caja
2 TIMOTEO 3:15
10
2 TIMOTEO 4:2
pihue'epí quehuaca ricá. 15 Pijyuhuácoja pihue'epí Tupana puráca'alo lana'aquéjami nacojé maárejecha. Raú
pihue'epí méqueca Tupana i'imataca iná capichácajo
liyá. Tupana puráca'alo lana'aquéjami quemari marí que:
“Iná pechu i'imacachu caphí Jesucristo chojé, Tupana
i'imatari iná capichácajo liyá.” 16 Tupana puráca'alo ricá
lana'aquéjami. Ripechu aú ri'imá riyucuna rilana'ajéñojlo
i'imacá. Ra'apiyá que nalana'acá ricá papera chojé.
Ñaquele palani inajlo Tupana puráca'alo lana'aquéjami.
Rehuíña'ata iná palá quehuácaje puráca'aloji nacú. Raca'á
caja huecá pu'uhuaré huala'acare chona. Rimá caja
huajló pu'uhuaré ajopana la'acare nacú, huala'acá piyá
ñaqué caja. Palá huani Tupana puráca'alo lana'aquéjami
jehuíña'ataca huecá, hue'emacáloje palá ra'apiyá penaje. 17 Tupana ja'apiyá jema'ajéñojloje penaje Tupana
puráca'alo lana'aquéjami, nahue'epícaloje que'iyapejé
palá la'acana nacojé raú penaje.
4
1 Eja'ahuá tajnájico ejomi Jesucristo quemájeri piyuque
ina'uqué nacú méqueca necá Tupánajlo. Rimaje caja
nacaje nala'acare nacú méqueca rijló ricá, palani ca'ajná,
pu'uhuareni ca'ajná. Marí eja'ahuá chu hue'emacá quetana huala'á nacaje. Ricá nacú rimaje huajló méqueca
rijló ricá. Ina'uqué caja taca'acaño nacú rimaje méqueca
rijló nacaje nala'acare. Ina'uqué cajmuruna nacú rimaje
caja mecajeca palani nacaje nala'acare. Jesucristo iphájeri piño majó ina'uqué huacára'ajeri penaje. Ñaquele
nuhuacára'a picá marí que Tupana, Jesucristo, quele
ijlú chuhua que: 2 Pa'apata ajopánajlo Tupana yucuna.
Pihue'epí pitucumó ricá. Pi'imá riyucuna najló pajimato. Pi'imá riyucuna huátaño rema'acánajlo, uncá
huátalañojlo hua'ató. Pica'áta ne'iyajé Tupana puráca'alo
2 TIMOTEO 4:3
11
2 TIMOTEO 4:8
aú, nala'acáloje palá raú penaje. Paca'á caja necá raú
pu'uhuaré nala'acare chona; pila'á caja ajopana pechu
caphí raú; pehuíña'ata necá palá. Piyúcha'aniyo caja
najhua'até uncaja que nahue'epí ricá quiñaja. 3 Uncá
ina'uqué huátalajeño quehuácaje puráca'aloji jema'acana
aquijñojo. Napechu nacú riyucuna i'imacá que caja
nahuátajica ajopana jehuíña'ataca necá. Ñaquele naculaje najluhua ina'uqué nehuíña'atajeño penaje, nehuíña'atacaloje necá nahuátacare caje nacuja penaje.
4 Napajno'otaje napéchuhua quehuácaje puráca'aloji liyá
jupichumi yucu ejo. 5 Pi'imajica queja pipechu i'imá
caphí. Pijña'á caja chapú caje panacu. Tupana i'imataca
ina'uqué capichácajo liyá yucúnaja pi'imá ina'uquejlo.
Ricaja pihue'epeje pitucumó. Pila'á pisápaca'ala palá.
Marí que pila'ajica nopumí chojé. Nula'acale Tupana huátaca que, nahuata nonócana. 7 Nula'á nusápaca'ala caphí nupechu i'imacá locópa'alaja. Huátaño
ajopana chá'atacana jecho'ocajo aú, jecho'oñó na'acá
rená ejená. Jecho'ojero pechu que caja nupechu i'imacá
nusápaca'ala la'acana nacú. Nutaca'ajica ejená nupechu
i'imajé Jesucristo chojé caphí. Uncá nócho'olajo richiyá.
8 Chuhua palani huani nacaje i'imajeri nojló, nula'acale
palá. Eja'ahuá tajnájico huacajé Jesucristo quemajeri
nacaje huala'acare nacú méqueca rijló ricá. Ricá hue'epiri
palá rinacu quemacana. Marí eja'ahuá chu hue'emacá
quetana huala'á nacaje. Rinacu rimaje huajló méqueca rijló ricá rihuacajé. Rimájica huanacu huacajé, rilamá'ataje
nucá nacaje aú palá. Ñaqué caja ra'ajica majopeja ajopánajlo nacaje. Iqui'i huátacaño Jesucristo pa'acó majó,
necá numá nacú.
6
Nacaje rimacare nacú rijló caja penaje marí:
2 TIMOTEO 4:9
12
2 TIMOTEO 4:18
Patá'ajla majó i'ijnacana quiñaja. 10 Caja Demas
ja'apáñari nucá, ri'ijnacáloje pajimila Tesalónica ejo penaje. Tupana chaje íqui'ica rihuátaca nacaje marí
eja'ahuá chu i'imacare. Caja riyurí riliyó Tupana huátaca
que la'acana. Aú calé ra'apaña nucá. Crescente, Tito,
quele uncá caja i'imalaño maare. Crescente i'ijnari ají
que Galacia te'eré ejo. Tito i'ijnari caja Dalmacia te'eré
ejo. 11 Ricaja calé, Lucas nujhua'até maare. Eco piculá
Marcos; pihuá'a ricá pijhua'ató majó, ra'achí nuñaté
maare nusápaca'ala la'acana aú. 12 Caja nuhuacára'a
Tíquico pajimila Efeso ejo. 13 Pi'ijnajica ee majó, pijña'á
majó no'orumacá naquiyana, nuyurícare pajimila Troas
e. Carpo ñacaré chu ricá. Pijña'á caja majó nupapérane
piyuque. Richaje íqui'ica nuhuátaca pijña'acá majó nupapérane nulana'acare chojé.
14 Alejandro, pejru'uhuá nacú sápajeri ricá, la'arí
nucá chapú huani i'imacá. Tupánaco a'á rijló rihuemí,
chapú rila'acare nucá huemí. 15 U'upejlú pi'imacá
riliyá. Caja chapú huani ripechu Tupana puráca'alo nacú
hua'apátacare ajopánajlo.
16 Nuqueño'ocá huacajé huate'eré eyaje huacára'ajeri
hua'até pura'acano nuchayo, piyuque nujhua'atéjena
ja'apáñaño nu'umacá. Nuhuata Tupana amaco nachaje.
17 Uncá Tupana ja'apáñala nucá.
Rila'á caphí nupechu, nu'umacáloje riyucuna penaje. Tupana i'imataca
ina'uqué capichácajo liyá yucuna nu'umá uncá judíona
calé naquiyánajlo. Tupana i'imatari nucá nupinana liyá,
nacapichátaca piyá nucá. 18 Tupana i'imatájeri piño
nucá ajopana nupinana liyá. Piyuque chapú caje yajhué
nomájicare liyá hua'ató ri'imataje nucá. Rilamá'ataje
nucá, nu'umacáloje rijhua'até je'echú chu penaje. Re
i'imacaño huacára'ajeri ricá. Palá huani napura'ajico
Tupana nacú hua'ajini huani. Marí queja ri'imajica.
9
2 TIMOTEO 4:19
13
2 TIMOTEO 4:22
Eco palá Príscajlo, Aquílajlo, quélejlo. Eco palá
Onesíforojlo, riyajálojlo, riyánijlo, quélejlo. 20 Erasto
yuriro pajimila Corinto e. Nuyurí Trófimo Mileto e.
Ritami ri'imacá aú nuyurí ri'imacá rejeja. 21 Patá'ajla majó
i'ijnacana yahuijá piyá. Ebulo, Pudente, Lino, Claudio,
piyuque Jesucristo ja'apiyá jema'ajeño i'imacaño maare,
quele quemaño pinacu: “Eco palá rijló” que.
22 Nuhuata Jesucristo i'imacá pipechu hua'até. Nuhuata caja Tupana la'acá icá palá rehuá piyuqueja. Maáreje
riyucuna tajnaro.
19
14
Tupana Puraca'alo Mari
New Testament in Yucuna
copyright © 2011 Wycliffe Bible Translators, Inc.
© 2011, Wycliffe Bible Translators, Inc. All rights reserved.
Language: Yucuna
Translation by: Wycliffe Bible Translators, Inc.
Copyright Information
© 2011, Wycliffe Bible Translators, Inc. All rights reserved.
This translation text is made available to you under the terms of the Creative Commons
License: Attribution-Noncommercial-No Derivative Works. (http:// creativecommons.org/licenses/by-nc-nd/3.0/) In addition, you have permission to port the text
to different file formats, as long as you do not change any of the text or punctuation
of the Bible.
You may share, copy, distribute, transmit, and extract portions or quotations from this
work, provided that you include the above copyright information:
You must give Attribution to the work.
You do not sell this work for a profit.
You do not make any derivative works that change any of the actual words or
punctuation of the Scriptures.
Permissions beyond the scope of this license may be available if you contact us with
your request.
The New Testament
in Yucuna
This translation is made available to you under the terms of the Creative Commons
Attribution-Noncommercial-No Derivatives license 4.0.
You may share and redistribute this Bible translation or extracts from it in any format,
provided that:
You include the above copyright information.
You do not sell this work for a profit.
You do not change any of the actual words or punctuation of the Scriptures.
Pictures included with Scriptures and other documents on this site are licensed just for
use with those Scriptures and documents. For other uses, please contact the respective
copyright owners.
2014-08-06
ISBN 978-1-5313-0722-6
PDF generated on 12 Nov 2016 from source files dated 12 Nov 2016
5b40ab64-069a-5dad-b1d1-fb9829e864cd