El nacionalismu revolucionariu n`Europa occidental

El nacionalismu revolucionariu n’Europa occidental
Por Javier Cubero
A lo llargo de los trenta años posteriores a la Segunda Guerra Mundial produzse
n’Europa occidental un procesu d’espectacular crecimientu económicu y fonda
tresformación social. El desendolcu aceleráu de la gran industria en desterciu del
sector primariu (agricultura, ganadería, pesca, etc.) va multiplicar los fluxos
migratorios, arrexuntándose un volume cada vuelta mayor de población nos barrios
periféricos de les ciudaes mientres que les fasteres rurales empecipiaben a convertise
en desiertos demográficos. Esti contestu de cambiu estructural, caracterizáu pola
descomposición de les formes tradicionales d’organización social y la masificación
de los bienes de consumu, paecía anunciar la desintegración de les etnicidades en
procesu d’aminorización. Ante situaciones asemeyaes nel pasáu, les comunidaes
étniques subalternes normalmente plantegaron alternatives de tipu conservador o
demócrata-cristianu, ya dalgunes vegaes inclusive tradicionalista, como reacción
defensiva frente a una Modernidá esóxena. Por embargu nesta ocasión articularon
una inesperada rempuesta adaptativa a la sociedá urbana ya industrial, sustituyendo
los elementos arcaizantes d’una imposible restauración de l’Aldea Primordial por
diversos materiales ideolóxicos procedentes de les corrientes más vanguardistes de
la dómina.
Les nueves xeneraciones de militantes nacionalistes, allugaes en centros
universitarios y fábriques fordistes, van chocar tanto coles estructures
gerontocrátiques de los vieyos ya inmovilistes partíos nacionalistes como coles
organizaciones político-sindicales herederes de la II ya III Internacionales Obreres,
plenamente integraes nel orde institucional al traviés del pactu keynesianu. Asina
nes décades de 1960 y 1970 va surdir una nueva fola de nacionalismos subestatales
que van combinar nel so discursu los factores étnico-culturales cola concepción
marxista de la llucha de clases. Son los llamaos «Movimientos de Lliberación
Nacional», que van ser fuertemente influyíos polos procesos independentistes de les
antigües colonies del Tercer Mundu, que vieron reconocíu’l so derechu al
autodetermín pola ONU. De fechu estes nueves corrientes van vese reflexaes
n’espeyos antiimperialistes como l’Arxelia de Ben Bella o la Indochina de Ho Chi
Minh, adoptando munchos de los sos elementos na so definición estratéxica ya
ideolóxica. La llucha pola lliberación nacional va ser concebida como una fase
previa a la revolución socialista na qu’una alianza d’obreros, campesinos,
intelectuales y pequena burguesía valtaría al Estáu opresor y a la burguesía
collaboracionista. Polo qu’en munchos casos estructuraríanse partíos leninistes de
vanguardia nel marcu de frentes policlasistes d’unidá popular. Nesa dirección el
maoísmu chinu foi una referencia doctrinal especialmente presente en países onde
les actividaes agropecuaries tovía teníen un pesu fundamental na estructura
socioeconómica. Amás dalgunes d’estes nueves organizaciones na so política de
«frentes de mases» optaron pola confrontación violenta col Estáu incluyendo
táctiques d’acción directa y guerrilla urbana.
Nesi xiru de radicalización esquierdista autores como’l llingüista occitanu Robert
Lafont, qu’ellaboró y sopelexó’l conceptu de «colonialismu internu» pa esplicar les
tensiones socioeconómiques del hexágonu francés, homologaron les rellaciones
d’integración estructural de los países periféricos nos Estaos-Nación europeos col
sistema de dominación colonial que calteníen les metrópolis n’ultramar. Tamién
tuvieron gran influxu les teoríes que’l médicu martinicanu Frantz Fanon espunxo nel
so llibru Los condergaos de la tierra (1961) sobre l’alienación cultural, la
interiorización de los prexuicios raciales y l’autoodiu que fomentaben les autoridaes
coloniales ente les poblaciones sometíes. Al empar va aniciase una dinámica de
recuperación y revaloración de les tradiciones de protesta llocal col envís d’articular
una nueva narrativa hestórica que «descolonizase» el pasáu del país. Nuna coxuntura
marcada pola agudización xeneral de los procesos d’aculturación el nacionalismu
revolucionariu va convertir la recuperación de la llingua y la cultura autóctones,
identificaes de manera esclusiva coles clases populares ante l’asimilación nacional
de les elites llocales polos Estaos, nun elementu central del so proyectu políticu.
Como señalaba Federico Krutwig, un importante ideólogu d’ETA, «en el caso vasco
es tan revolucionario hablar vascuence (o aprenderlo cuando no se lo domina) como
el poner una carga de plástico»[1].
Una de les principales espresiones doctrinales d’esta esplosión nacionalitaria sería la
Carta de Brest, un manifiestu publicáu’l 3 de febreru de 1974 nel que se llamaba a la
llucha conxunta por una Europa socialista de pueblos llibres y soberanos. Esti
documentu foi robláu por distintes organizaciones d’Irlanda (IRM, federación del
Sinn Féin y del IRA oficiales), Gales (Cymru Goch), Bretaña (UDB), Galicia
(UPG), Euskalherria (EHAS, per Iparralde, y HASI, per Hegoalde), Cataluña
(Esquerra Catalana dels Treballadors, pel norte continental, y PSAN-p, pel sur
peninsular), Occitania (Lucha Occitana) y Cerdeña (Su Populu Sardu). Estos
movimientos nacionales d’esquierda anticapitalista llograron adquirir implantación y
protagonismu social naquellos territorios «donde (…) cubrieron un vacío
generacional más o menos pronunciado, donde no existía base social adecuada para
un partido nacionalista de centro (Galicia), o bien donde circunstancias de conflicto
étnico, social y/o represión estatal crearon un caldo de cultivo adecuado para la
reproducción práctica de las teorías de la lucha armada (País Vasco, Irlanda del
Norte, Córcega)»[2]. Frente a los partíos tradicionales del nacionalismu subestatal y
del movimientu obreru, que nos meyores casos basculaben ente los parámetros del
reformismu social y del autonomismu políticu, mientres que n’otros taben fondiaos
nel conservadurismu clerical o nel estatalismu xacobín, el nacionalismu
revolucionariu va configurar la so identidá en términos de rotura radical tanto colos
Estaos-Nación como col sistema capitalista. Asina por exemplu na Carta de Brest
plantegábase que:
La lluita per l’alliberament nacional no és una lluita diferent de la lluita pel
socialisme. No es pot dir ni tan sols que la lluita d’alliberament nacional estigui
lligada a la lluita d’emancipació social; són una sola i idéntica lluita. La lluita
d’alliberament nacional no és més que un aspecte particular que pren la lluita de
classes en els països oprimits i sotmesos a una explotació colonial i la lluita pel
socialisme pren, per als nostres pobles, la forma d’un alliberament nacional.
Arribats en aquest punt volem denunciar els oportunistes de dreta i d’esquerra.
Els de dreta diuen: “primer ens alliberem nacionalment i després establirem el
socialisme”. L’Estat és sempre, un instrument de dominació de la classe que es
troba al poder. Un Estat per damunt de les classes socials, un Estat sense “caràcter
de classe” no pot existir. Aquest Estat sense “caràcter de classe” que els
oportunistes de dreta ens volen fer passar, no pot ser altra cosa que la continuació,
més o menys disfressada, de la dominació imperialista a través dels seus agents
locals, amb una independència purament formal com és el cas d’Irlanda del Sud.
Els oportunistes d’esquerra diuen: “establim el socialisme i després el socialisme
alliberarà els pobles oprimits”. El socialisme no és una cosa abstracta. S’ha
d’adaptar a les condicions específiques de cada país. La història ens ensenya que el
pas al socialisme no es va realitzar d’una manera igual en els diversos països avui
en dia socialistes (URSS, Xina, Vietnam, Cuba, etc.). Els qui neguem el marc
nacional del pas al socialisme afirmen, en la majoria dels casos, el marc dels
actuals Estats imperialistes.
L’internacionalisme proletari no significa la negació de l’existència dels diferents
pobles sinó la germanor i la igualtat de tots els pobles del món[3].
[1] LORENZO ESPINOSA, José María, Txabi Etxebarrieta. Armado de palabra y
obra, Txalaparta, Tafalla (Navarra), 1993, p. 65.
[2] NÚÑEZ SEIXAS, Xosé M., Movimientos nacionalistas en Europa. Siglo XX,
Editorial Síntesis, Madrid, 2004, p. 271.
[3] Carta de Brest. Declaració sobre la lluita contra l’imperialisme a l’Europa
Occidental, p. 3.