HORROS EN MUNDU Y PEL TIEMPU

HORROS EN MUNDU Y PEL TIEMPU
Espublizáu nel suplementu ‘La Nueva Quintana’ del periódicu La Nueva España, 15 de xunetu de 2007
Xuan PEDRAYES OBAYA
1. Graneru oromo. Etiopía 2. Graneru karo. Etiopía 3. Horru en Níger 4. Horru mossi tipo seudo-Katchalla. Burkina Faso
5. Cincolote otomí. México 6. Troje taplanecu. Guerrero. México 7. Graneru kurumba. Burkina Faso
8. Graneru haoussa. Níger 9. Horru gumuz. Etiopía 10. Graneru kassena 11. Bescomatl. México
12. Horru kpéou. Togo 13. Hebre suecu 14. Stabur noruegu 15. Horru en Gilan. Irán 16. Mazot suizu
17. Lumbung sasak. Indonesia 18. Choza ifugao. Filipines 19. -Reconstrucción d’un kura xaponés. ÉpocaYayoi (-300 a.X)
HORROS EN MUNDU Y PEL TIEMPU
Espublizáu nel suplementu ‘La Nueva Quintana’ del periódicu La Nueva España, 15 de xunetu de 2007
Xuan PEDRAYES OBAYA
Los asturianos consideramos al nuesu horru como una construcción singular y única;
y ensin duldes ye-lo enforma, pero nun dexa de ser un graneru aéreu, un de los
munchos granaria sublimia conocíos, como señalare’l profesor Tabanera, en dos
estudios ya clásicos incluyíos na so edición del llibru del antropólogu polacu
Eugeniusz Frankowski, Horros y palafitos de la península ibérica.
Hubiere, y hai, horros n’Asia (Irán, Indochina, Xapón...), África (Uganda, Madagascar,
Chad...), Europa (Inglaterra, Macedonia, Hungría, Finlandia, Rusia...), Oceanía
(Nueva Guinea, Melanesia), América (México, Ecuador...) y na península ibérica
(Navarra, Euskadi, Galicia y Portugal).
Repasemos el llugar que tuvieren y tienen los horros en mundu y pel tiempu.
TORTA Y LLECHI. LA REVOLUCIÓN NEOLÍTICA
L’horru ye una arquiteutura universal qu’apaez cola llegada de lo que se llamare
Revolución Agrícola del Neolíticu (-10000 a -4000 a. C). A la llechi de los nómades
amestáronse-y los cereales de l’agricultura asitiada: maíz n’América, panizu y trigu
n’Europa, arroz n’Asia y sorgo n’África. La torta y la llechi fueren l’alimentu básicu
neolíticu y, por ciertu, n’Asturies fuérenlo hasta hai cuatro díes. La historia de los
horros ye consecuencia del usu de los cereales nes distintes civilizaciones.
La función del horru ye conservar la collecha granu nun espaciu con bones
condiciones de ventilación, humedá y temperatura. Los horros más primitivos son
más especializaos y pequeños, pero en faciéndose mayores recueyen usos más
variaos: dispensa onde morcar alimentos, tendayu pa secar, y cola medra’l solhorru,
esti sirvió de güeco y abellugu los aperios. Un graneru fáese horru n’asitiándose nuna
plataforma ventilada perbaxo, que meyora les condiciones de conservación y protexe
de los ratos. Los más cenciellos sepárense del suelu con piedres, unos maderos o
llantaos enriba unos pilpayos. L’horru tien que ver cola comida, y el comer ye sagrao.
Ye un símbolu de la griesca ente l’home y la fame, como lo fuere Yun-kaax, el dios
maya del maíz, engarráu escontra los dioses de la seca, el vientu, el lloviu y la
muerte.
Deméter la diosa griega de l’Agricultura; Quetzalcóatl, qu’entró nel inframundu pa
robar el maíz y dáy-lu a los homes; l’emperador míticu Sheng Nung, descubridor en
China de la soja nel tercer mileniu a.X o el robu del ñame nel xardín de los dioses en
Polinesia muestren el llugar señaláu que tienen los cereales y tubérculos nes
cosmogoníes. Munchos pueblos consideraren a los cereales un don de los dioses. El
pan, la torta, ye un alimentu místicu y material n’eucaristíes y bacanales. L’horru ye
un sagrariu, y como tolos sagrarios, tien llave; y delles veces camudó en templu: en
1936, l’arquiteutu tudescu Bruno Taut ya señalaba, nun estudiu sobre la vida
xaponesa, l’aldéu ente los templos sintoístes, evolucionaos de los graneros
tradicionales, y los horros suizos y suecos.
Anguañu, en munches etnies africanes atopamos horros de los anicios, xurdíos de la
tradición neolítica de los pastores-agricultores. La sardera vexetal y el barru,
principios xerminales, son los materiales emplegaos na so construcción.
Horros cesta. Lo horros emprencipiaron siendo una goxa, una texeduría fecha de
vanielles vexetales. Entaramingáu enriba d’una plataforma, la cesta fáese canastru.
Hai munches clases d’ellos: n’Ourense y Portugal, los kukuruzniak serbios de los que
falaba Frankowski, los horros texíos pelos mossi n’África, los cincolotes fechos pelos
indios otomíes en México o el ‘sixi’, versión andina d’un horru. Esti ye un troje aymara
fechu de totora p’almacenar el chuño, pasta de fécula de patata, que sirve pa facer
tortes.
De la cacía al horru d’adobe. En dellos tiempos y países, el graneru tamién
escomencipió siendo cacía, pocu más qu’un pote. Llueu medró, fízose d’adobe y echó
patuques, unos pilpayos. Los horros d’adobe son pequeños, tienen un solhorru
perruín y la so puerte ye mui cenciella (delles veces séllenlos ensin más).
El maíz domesticóse en México hacia’l –8000 a.X y nesi país hai cientos de variedaes
d’élli, poro qu’en horros tienen muncha bayura. Los cuexcomates son una triba
d’ellos. El so nome vien de la pallabra naualt ‘cuexcomatl’, que significa “olla de
barru” o ‘llugar onde guardar’. Fechos d’adobe, son daqué más qu’un pucheru con
teyáu de paya y una pasera; entovía en sieglu XVII colocaben ídolos dientro pa que
multiplicaren les panoyes. Cerque de Morelos, había un tipu d’horru pal maíz, llamáu
‘bescomatl’, un cuexcomatl evolucionáu, un horru-pegollu esencial, col teyáu
asemeyáu a dellos cabazos d’Ourense y cola so cella más diferenciada.
L’adobe, un barru meyoráu con paya y cuchu úsase dafechu n’Africa. Atopámoslu nos
graneros de los Gumuz n’Etiopía; nos dogon en Mali, onde la puerte de maera ya tien
un simbolismu destacáu; nos kassena en Burkina Faso o los senufo en Costa de Marfil
pente munchos otros pueblos.
ROMA. CAPITOLIUM ET HORREA
Los horros fueren perimportantes nes ciudades. N’organizaciones sociales complexes
los impuestos cobrábense en granu. El so aprovisionamientu controláu espantare la
fame n’años de males celleches. D’esta manera surtíense les grandes ciudades y los
exércitos na Historia Antigua; de los imperios babilónicos a Exiptu o Roma.
El status romanu conseguíase cuando nel foru la ciudá sometía llantábase’l capitoliu,
colos templos dedicaos a la tríada capitolina (Xúpiter, Xuno y Minerva). Pero el ordo
romanu afitábase na intendencia. Roma fuere una urbe fluvial, con un puertu na
desembocadura del Tiber, Ostia, y un embarcaderu interior a la vera’l ríu llamáu
Emporium. Nos dos puertos fabricaren los romanos nes dómines de Trajano horrea
monumentales. Per tol imperiu una rede de horreum publicum garantizaba
l’abastecimientu a la plebe romana y al exércitu. Los horros “a la romana” son
edificios de maera o piedra onde’l so pisu sepártase del suelu pa meyorar
l’aislamientu de la humedá.
MUGORIZU ASIÁTICU
El ‘funcionalismu climáticu’ n’ecosistemes asemeyaos empobina a soluciones
arquiteutóniques con poca variación, anque la tradición cultural aporta dellos
cambios. N’Asia, col calor húmedo y el munchu lloviu, les sociedaes agraries
aplicando’l proverbiu del ‘mínimu recursu, máximu confort’ allegaren al horru total:
l’hamaca, una mena de cama-horru; cases, templos, graneros... asitiaos toos nuna
plataforma escontra les humedaes, el calorizu y el barru. Nesos climas empleguen
tamién teyaos enanchaos, de poca masa pa que nun pase’l calor pela nueche y dean
sombra, parees cencielles y como material el bambú, vexetal a mediu camín ente la
sardera y la maera. Los horros de los chin en Birmania, o los fechos pelos
minangkabau del centro de Sumatra son bon exemplu de tou ello.
Horru Takakura (Japón)
Horru Mamasa (Indonesia)
HORROS Y VIESCA PELA EUROPA MEDIEVAL
L’hachu y el llabiegu coraren la viesca europea, añegratada y pagana, faciéndonla
pandu y güerta. Na colonización del arbolíu, l’home européu domesticó la viesca; la
xeometría humana del horru impúsose a la retorcigañada Naturaleza. Xurdieren
entóncenes horros de maera per toa Europa, de buen tamañu: l’hebre suecu, el solek
polacu, horros n’Eslovenia, na Savoya, n’España, Italia, Suiza o Turquía.
Horros y vivienda. La funcionalidá y l’usu de los materiales empobinen al
‘isomorfismu arquiteutónicu’ qu’esplica como soluciones parecíes apaecen en cultures
separtaes miles d’años y kilómetros. L’empléu del mesmu sistema constructivu nos
horros y nes viviendes d’una cultura danse tamién daqué. Dos casos particulares pela
so parecencia colos horros asturianos son el de la provincía iraní de Gilan, asitiada a
la oriella del Mar Caspiu, y les chozes de los ifugao en Filipines. En Gilan los sos
horros, de teyaos pindios, danse un semeyu a los horros asturianos con teitu, y un
tipu de vivienda irania desenrolla’l mesmu sistema constructivu emplegáu nos horros
gilaníes. Cerque de la so capital Rasht, acaba d’inaugurase la primera fase d’un
muséu al aire llibre onde pueden vese estes arquiteutures. En cuantu a los ifugao de
la isla de Luzón, son horros-vivienda, col so llar dientro. Na exposición filipina de
1887 llantaren nel Retiru madrilanu dalguna d’estes perguapes construcciones.
Casa Ifugao (Filipinas)
Horru en Tailandia
En Michoacán (México), los trojes camúdense en vivienda y son desmontables.
N’Europa, los mazots suizos y los stabur noruegos, colos sos requilorios, desenrollen
dacuandu usos mixtos casa-panera. Un casu estremu ye’l del pueblu toraja, na isla
indonesia de Sulawesi; faen les sos cases (tongkonam), los sos horros (lumbung) y
los sos catafalcos funerarios cola misma forma.
Los horros siguen en plenu usu en munchos países. La FAO (organización de les
Naciones Xuníes pala agricultura y alimentación) entamó dende 1977 programes pa
meyorar el diseñu de los horros tadicionales n’África y América; en 2005 repartiere
n’Afganistán 14.000 silos metálicos. Hai fame a esgaya.
Arca y relicariu de cosmogoníes, l’horru ye un arquetipo (un obxetu colectivu) onde la
Humanidá espanta la fame del so cuerpu y l’esmolimientu de la so alma. Los
asturianos ya nun tamos esfamiaos, pero l’horru si mos presta guapamente pa
escorrer los nuesos mieos y acolumbrar, ellí lloñe, l’Asturies eterna.