1 Un miembro di direktiva tin drechi riba rekompensa? Kuantu un

$$$
Un miembro di direktiva tin drechi riba rekompensa? Kuantu un miembro di direktiva mester gana e
ora ei? Ken ta tuma desishon tokante e montante di e rekompensa? E direktiva mes? Un miembro di
direktiva tin drechi riba kompensashon manera gastu di telefòn? E tin derechi riba pago pa su
asistensia?
E preguntanan aki ta hopi relevante pa tur fundashon riba nos isla, chikí i grandi. Nan ta aktivo riba
terenonan hopi diverso. Pensa riba deporte, bibienda, dominó i ahedres, skol, sindikato, hòspital, kas
di kuido di hende grandi, etcetera. Tur ten un fundashon tin un asina yamá meta ideal. Esei ta zona
bunita. Algun fundashon tin di bèrdat un meta bunita. Sinembargo ta konsiderá un fundashon grandi
hopi biaha komo kompanianan “normal”. Pensa riba hòspital, FKP, SOAB. Mi ke trata aki
rekompensa di direktiva di un fundashon chikí.
Manehá pues ta un tarea responsabel. Riba tereno hurídiko ta mirá direktiva di fundashon komo e
“doño” di e fundashon. Nan ta representá e fundashon den relashonnan interno i tambe eksterno,
esaki ke men pa komunidat. Huristanan ta bisa e ora ei ‘relashon sosial’. E direktiva mester sòru pa
haña sufisiente entrada. E mester sòru tambe pa usa e fondo konforme e meta di e fundashon. Pues
e direktiva di un fundashon deportivo no por usa e fondo pa kuido di salú di otro hende. E direktiva
di un instituto di kuido di salú no por usa e fondo pa supsidiá deporte. E direktiva ta prinsipalmente
responsabel pa kontinuidat di e fundashon. I awendia ta bini aserka tur e rísikonan mará na e
responsabilidat aki. Esakinan ta konta pa tur fundashon, grandi i chikí. Ki balor esaki tin?
Ya. Lamentablemente tur responsabilidat den direktiva di un fundashon òf den un asosiashon en
general no tin hopi balor. Aloménos si bo konta esaki den sèn anto. Bo no tin ‘derechi’ riba
rekompensa. Esei ta netamente e parti klave. E idea ta ku bo ta drenta den un direktiva òf
asosiashon pasombra bo ke kontribuí pa un bon kousa. Bo inspirashon no ta den un rekompensa di
sèn, pero den e sentimentu pa duna di bo mes pa algu bunita. Esaki por tin komo resultado ku e
akountent, ku normal ta gana ANG 600,00 pa ora, alabes ta tesorero di un asosiashon di futbòl, ta
hopi ora okupá ku e relato anual di e asosiashon i no ta risibí nada pa esaki. Ya, un bon sentimentu i
e posibilidat pa su yunan hunga bala.
Tòg tin miembro di direktiva ta haña ku nan tin derechi di risibí rekompensa, maske ta un
kompensashon di gastu. Kon esei ta bai? Básikamente no tin ningun inkumbinensia pa duna sèn di
fakansi i/òf un kompensashon di gastu. Sèn di fakansi ta un kompensashon (limitá) pa tei presente
na reunionnan. Esei ta lanta pregunta si. Na promé lugá e pregunta pa konsekuensianan fiskal, i
banda di esaki e montante di e kompensashon di gastu. Na di tres lugá ken ta tuma desishon tokante
e montante di e kompensashon. Tambe ta interesante e pregunta si pa servisionan adishonal komo
miembro di direktiva por haña pago i finalmente e pregunta si un persona por ta empleado i
miembro di direktiva di un fundashon alabes. E siguiente kolumna lo trata e sinku preguntanan aki.
Bo tin pregunta tokante di corporate governance? Sea asina bon di mand’é na
governance@ekvandoorne.com i ken sa, bo pregunta lo por wòrdu trata den nos próksimo
kolumna!
1