Almugabars d`Aragón - Fundación Gaspar Torrente

Almugabars d’Aragón “…trayen un buen cultro e buena correya e una armiella en a zincha (…) una buena lanza e dos dardos (…) una anetera de cuero á l’espalda, do portian o suyo recau. E son mui zereños e mui rapedos, ta fuyir e ta engalzar; e son catalans e aragoneses e sarrazenos.” Bernat Desclot describió os guerrers almugabars (“os que salen en algarada”) á finals d’o sieglo XIII, dimpués d’a conquista de Sizilia (1283) en a que ístos chugoron tan dezisibo paper en o trunfo d’as armas aragonesas. E manimenos, encara estaban por alcurrir os feitos d’a Compañía d’Orién que darban á os almugabars a suya fama definitiba e o dominio d’os ducados de Zetina (u Atenas) e Neopatria. Catalans, aragoneses e sarrazenos… e sizilianos, balenzianos, mallorquins, oczitanos, sardos, bulgaros… En diferents momentos s’unioron á istos solches de fortuna chens de tot ro Mediterránio que compartioron con ellos a suya sanguinaria forma d’acatar a bida ta trobar riqueza y estabilidá. Dentrata de Roger de Flor en Constantinopla (cuadro de José Moreno Carbonero, 1888) As primeras notizias sobre ellos (¿yeran reyalmén ellos?) ya las dan as coronicas musulmanas d’a conquista de Zaragoza en a primabera de l’año 714. Quí sape si yeran continadors d’os guerreros bagaudas que dende o sieglo V dica mesmo poco antis d’a conquista musulmana alleroron a Bal de l’Ebro, e d’os que Salviano de Marsella diziba que “Prefirioron bibir libremén con o nombre d’esclaus, que no pas fer esclaus con o nombre de libres.” Zurita da cuenta d’a suya reaparixión, prezisamén en tierra aragonesa, dimpués d’a conquista de Tauste (1005): “E poco dimpués escomenzó á meter chen adreta en a guerra e pro exerzitata en ella, que clamaban almogabars, en o Castellar ta que estasen fren á os moros de Zaragoza”.
Serán presens en a conquista de Mallorgas, e de traza contina en a de Balenzia, interpresa endizcata alazetalmén por aragoneses, dimpués de cuala fin marcharban como fuerza de choque en as naus de Pietro III, que baxo ro siñal d’a Cruz de San Chorche d’Alcoraz interbinioron en Túnez e conquistoron Sizilia, Malta e Napols. Luitoron con esito cuantra ra gran imbasión franzesa de 1285 e, ya alcostumbratos á biachar en as naus catalanas e sizilianas, en que ro suyo ofizio dixó de fer-­‐le onra e d’estar comodo á o rei d’Aragón, se metioron á o serbizio de Bizanzio. Allí dimpués de redotar á otomanos, bulgaros, á os propios bizantinos que lis traizionoron e á os caballers francos en a baralla d’o río Zefis, u Halmyros (1311), s’aposoron definitibamén en os suyos ducados griegos. Yeran denominatos de muitas trazas, e a suya emenzión como catalans tiene tot ro suyo sentiu, dato que antimás d’aber-­‐ne á o menos tantos como d’aragoneses entre ellos, en os puertos mediterránios yeran mayoritariamén catalanas as naus que lebaban o siñal d’o rei d’Aragón, estando temitos os ataques de saqueyo u de conquista que lebaban á cabo, como en feban tantos atros pueblos riberanos d’o Mare Nostrum. Adautoron o nombre d’Atenas á ra suya propia tradizión fonetica e toponimica d’orichen, clamando-­‐la Zetina u Zetines; beneraban con delera á o patrón d’os guerrers aragoneses, San Chorche –cualos repuis se leboron d’a suya tumba de Capadozia-­‐ e lebaban o suyo pendón acantonato con as cuatro capezas de moros dando fe d’o suyo apego á o rei d’Aragón; dentraban en combate chilando “¡Aragón, Aragón!”; aplicoron como lei propia en Zetina e Neopatria os fueros d’Aragón e as constituzions de Cataluña en pie d’igualdá, seguntes l’orichen u ascrizión á cualque d’as dos nazionalidaz prenzipals que los farchaban. Y estioron o ementato Desclot e, sobre tot, Ramón Muntaner os suyos más aliñosos cronistas, describindo en luenga catalana os suyos nombres e feitos, eroicos ta ellos, terrorificos ta os que sofrioron as suyas crueldaz. Ta ro bueno e ta ro malo (que bi n’abió arrienda) son suyos e nuestros, catalans e aragoneses, os almugabars d’Aragón Miguel Martínez Tomey Fundazión Gaspar Torrente