Premiu «Xosefa Xovellanos» de Novela (36.ª edición)

Premiu «Xosefa Xovellanos» de Novela
(36.ª edición)
Francisco Álvarez, pola obra Lluvia d’agostu
A esti gallardón podíen presentase noveles en llingua asturiana de tema, xéneru y
estructura llibres, con una estensión mínima de setenta y cinco páxines, siempres que
foren inédites y non premiaes n’otros concursos. El xuráu encargáu de valorar les obres
presentaes tuvo presidíu pol director xeneral de Planificación Llingüística y
Normalización, Fernando Padilla, y cuntó cola participación de los escritores Miguel
Barrero, Elisabet Felgueroso, Antón García, Pilar Sánchez Vicente y Lourdes Álvarez.
El xuráu decidió por unanimidá conceder el Premiu a la novela titulada Lluvia d’agostu,
destacando “la estructura, la trama y desenllaz narrativu qu'inducen a la llectura
continua de la obra, xunto col manexu de fontes d’información y documentación
qu'aporten verosimilitú a la historia narrada”. El testu presentóse col seudónimu
ANDREÁS CORFÚ. N’abriendo la plica, l'autor ganador resultó ser Francisco Álvarez.
Francisco Álvarez (Xixón, 1970) ye periodista y traductor
lliterariu d'italianu. Trabayó nel diariu El Comercio y ye
autor de publicaciones en castellanu y asturianu. Les dos
primeres Patiu de prisión y En poques pallabres fueron
publicaes nel añu 1998. Nel 2003 publica Dixebra.
Cróniques d’un pueblu, y nel 2012 Un país llamáu Dixebra.
La historia y les lletres de la banda decana del rock
n’asturianu. Como traductor destaca la versión n’asturianu
de la obra de Leonardo Sciascia, Una historia cenciella.
Premiu «Xuan María Acebal» de Poesía
(21.ª edición)
Antón García, pola obra Ferralla
A esti gallardón podíen presentase poemarios de tema, xéneru y estructura llibres
escritos en llingua asturiana con una estensión mínima de quinientos versos, siempres
que fueren inéditos y non premiaos n'otros concursos.
Un xuráu presidíu por Fernando Padilla, director xeneral de Planificación Llingüística, y
del que formaben parte los escritores Pablo X. Suárez, Elías Veiga, Esther Prieto y
Ángeles Carbajal, además del filólogu Xosé Miguel Suárez, decidió por mayoría
conceder el premiu al poemariu tituláu Ferralla, destacando, según consta nel acta,
«que nel testu se trata un tópicu poéticu como’l de la muerte usando una estructura
orixinal, de gran fuercia espresiva y con referencies cultes y populares perfectamente
engarzaes». Abierta la plica, l’autor ganador resultó ser Antón García.
Antón García (Tuña, Tinéu, 1960) ye llicenciáu en Filoloxía
Española pola Universidá d’Uviéu. La so obra poética arrinca cola
edición en 1984 d’Estoiru y recoyóse nel 2007 nel volume La
mirada aliella (Poesía reunida 1981-2006), onde incluye los sos
otros dos poemarios publicaos, Los díes repetíos y Tierra
adientro, con un prólogu de José Luis Piquero. Nel 2011
publicóse una antoloxía amplia de la so obra n’edición billingüe
baxo’l títulu La mirada atenta / La mirada aliella, con prólogu
d’Araceli Iravedra.
La so obra poética ta traducida a delles llingües: francés, catalán,
gallegu, portugués, vascu, rusu, occitanu, alemán y bretón.
Premiu «Máximo Fuertes Acevedo» d’Ensayu
(21.ª edición)
José Ángel Gayol, pola obra Vértigu. L’atracción del abismu na sociedá
contemporánea
El director xeneral de Planificación Llingüística y Normalización, Fernando Padilla,
presidió la reunión del xuráu, nel que participaron los escritores y investigadores Ramón
de Andrés Díaz, Damián Barreiro Maceiras, Elena de Lorenzo Álvarez, Marta Mori de
Arriba y Luis Casteleiro Oliveros.
Ente les obres presentaes, el xuráu decidió, por mayoría, conceder el gallardón al testu
tituláu Vértigu. L’atracción del abismu na sociedá contemporánea, destacando, según
consta nel acta, «el so planteamientu modernu, la so estructura novedosa y
l’harmonización de narración y xéneru ensayísticu con un llinguaxe áxil».
El testu ganador presentóse baxo’l seudónimu «Emmanuel Bove». Abierta la plica,
l’autor resultó ser José Ángel García Fernández, José Ángel Gayol.
José Ángel Gayol (Mieres, 1977) ye llincenciáu en Derechu pola
Universidá d’Uviéu y llicenciáu n’Antropoloxía Social y Cultural
pola UNED. Escritor y críticu lliterariu, ye autor de la novela
Argonautes (Ámbitu, Uviéu, 2007), la obra de teatru Ensin
noticies del fin del mundu (ganadora del Premiu «Asturies Xoven
de Testos Teatrales» 2010), mesmo qu’artículos y cuentos en
prensa y antoloxíes. Ye amás una de les voces más importantes de
la poesía asturiana nueva, y nesti ámbitu foi yá merecedor de los
prestixosos premios «Asturies Xoven de Poesía», «Elvira
Castañón», «Fernán Coronas» y «Xuan M.ª Acebal».
Premiu «María Josefa Canellada» de Lliteratura Infantil / Xuvenil
(8.ª edición)
Vicente García Oliva, pola obra Fontenebrosa III: el final
El xuráu que valoró los trabayos presentaos reunióse na Casa la Cultura de Santoloya
(Cabranes) baxo la presidencia del director xeneral de Planificación Llingüística,
Fernando Padilla, y cola participación de les escritores y especialistes en lliteratura
infantil y xuvenil Lourdes Álvarez García, María Teresa González, José Luis Remis y
María Xosé Rodríguez. Ente los miembros del xuráu figuraben, amás, l'alcalde de
Cabranes, Gerardo Fabián; y Alonso Zamora Canellada, fíu de la escritora María Josefa
Canellada, que da nome al gallardón.
Ente les obres presentaes, el xuráu decidió por unanimidá conceder el Premiu al testu
tituláu Fontenebrosa III: el final, destacando, según consta nel acta « l'habilidá cola que
se construye un universu míticu a partir del ritmu narrativu y la caracterización de los
personaxes».
Abierta la plica, l’autor ganador resultó ser Vicente García Oliva.
Vicente García Oliva (Xixón, 1944) ye un autor de
referencia n'Asturies. Profesor mercantil y miembru de
númberu de l'Academia de la Llingua Asturiana, los
sos empiezos nel mundu lliterariu tán venceyaos a los
concursos de cuentos curtios de Conceyu Bable. Tien
una ventena de llibros publicaos n'asturianu y
castellanu, nos que cultiva tanto la lliteratura xuvenil
como la novela policiaca o l'ensayu. Ye tamién
ganador de diversos premios lliterarios: el Premiu
«Máximu Fuertes Acevedo» d'Ensayu, que convoca'l
Gobiernu del Principáu d'Asturies; el Premiu
«Llectures pa rapazos», de l'Academia de la Llingua
Asturiana; o'l Premiu de la Crítica d'Asturies, ente más otros. Pioneru de la lliteratura
infantil y xuvenil en llingua asturiana, en 1984 publicaba Fontenebrosa: el reinu de los
silentes, empecipiando una triloxía qu'agora se ve rematada col testu premiáu, nel que
s'amplía'l mundu simbólicu del reinu de Fontenebrosa.
Premiu «Alfonso Iglesias» de Cómic
(7.ª edición)
Ruma Barbero, pola obra El viaxe a la lluz
Ruma Barbero ganó la 7.ª edición del Premiu «Alfonso Iglesias», al que podíen
presentase cómics d’estilu, tratamientu y tema llibres, escritos en llingua asturiana y con
una estensión mínima de cincuenta páxines, siempres que fueren inéditos y non
premiaos n’otros concursos.
El xuráu encargáu de valorar les obres presentaes presidiólu’l director xeneral de
Planificación Llingüística y Normalización, Fernando Padilla, y tuvo formáu polos
dibuxantes Enrique Carballeira y Berto Peña; la profesora y editora M.ª Concepción
Prieto Pérez, y los filólogos Luis Casteleiro Oliveros y Xosé Miguel Suárez Fernández.
El xuráu, qu’otorgó’l premiu por unanimidá, destacó «la orixinalidá y complexidá de la
historia, l’interés temáticu y l’anovación de les soluciones gráfiques y cromátiques». El
testu presentóse col seudónimu «Charles Atlas». N’abriendo la plica, l'autor ganador
resultó ser Rumaldo Antón Barbero de Diego.
Rumaldo Antón Barbero de Diego, Ruma Barbero (Xixón,
1971) ye llicenciáu en Belles Artes pola Universidá de
Salamanca, músicu, diseñador gráficu y profesor de cómic na
Universidá Popular de Xixón. Yá algamara, nel 2009, esti premiu
na so primer edición con Manzajú, editáu al añu siguiente. Tien
ganaos amás otros prestixosos premios autonómicos de cómic
como «El Llapiceru» y «Comarca de la Sidra». Miembru
fundador de los grupos de folk asturianu Felpeyu y Los
Citriquinos, ye amás lletrista pa estos y otros grupos musicales,
autor de cartelos teatrales, cinematográficos, de conciertos y
festivales de cine.