la organización de muyeres de suatea llamenta l`informe comunicáu

ORGANIZACIÓN DE MUJER
LA ORGANIZACIÓN DE MUYERES DE SUATEA LLAMENTA LA
RESULTANCIA DEL INFORME PUBLICÁU POLA RAE
Dende la Organización de Muyeres de SUATEA, claramente comprometíes con un usu
del llinguaxe non sexista, nun podemos más que llamentar l'informe publicao y
aprobao pola RAE, ellaboráu por Ignacio Monte “Sexismu llingüísticu y visibilidá de la
muyer” nel que pretende poner n'entredichu nueve guíes o manuales d'usu non
sexista del llinguaxe. A lo llargo de les 18 páxines del informe, l'académicu intenta
desmontar la validez del usu de dichos manuales aludiendo que s'ellaboraron al marxe
de llingüistes (qué va pensar d'ello Eulalia Lledó por casu), utilizando una serie
d'argumentos que más bien paecen de defensa, ante lo qu’al paecer considera un
intrusismu profesional, y que sicasí escaez cuando alude al tema de la paridá. Nun
dulda n'intentar enfrentar a les muyeres no tocante a la valoración de los encamientos
d'estes guíes, citando a eminentes científiques y muyeres comprometíes cola igualdá y
que sicasí nun usen el llinguaxe inclusivu; tampoco dulda en provocar la discrepancia
cuando menta que les muyeres nun se sienten escluyíes y escaez que les guíes
busquen siempre la sensibilización sobre un tema u otru, ¡si nun fixera falta la
concienciación social nun se fadríen! Nun paez entender qu'una cosa ye que les
persones manifiesten al traviés del so usu del llinguaxe actitúes patriarcales y otra ye
que del usu del xenéricu masculín perpetúase esi sexismu y refuérzase. D'últimes les
sos constantes alusiones a que n'otres llingües s’usa masculín xenéricu, al orixe
d'estes llingües según conocemos, nun nos satisfaz, pos la llingua ta viva, sinón fora
asina siguiríamos falando y escribiendo en romance (nel casu del castellán), la llingua
tien de ser caltenida, en concencia, pero nunca encorsetada en cánones inflexibles
que nun dexen la so crecedera y el so reflexu de la realidá social, y nesti casu ye que”
la metá” de la población española ye femenina y por tantu tien de ser nomada en
femenín.
Uviéu 6 de marzu de 2012
SINDICATU UNITARIU Y AUTÓNOMU DE TRABAYADORES DE LA ENSEÑANZA D'ASTURIES
C/ Telesforo Cuevas 2, 1u A dcha. -33005 Uviéu. Tfnu. 985 274 343. Fax. 985 236 464. E-mail: suatea@suatea.org Web: www.suatea.org