Dialoog Papiamentu 2016-03 Les 3 pa 10-16 yuli - Joycita

Dialoog Papiamentu 2016-03
Les 3 pa 10-16 yuli
HUSTISIA SOSIAL I MISERIKORDIA
LESA: Eksodo 22:21-23; 23:2-9; Amos 8:4-7; Isaias 1:13-17; 58:1-14; Echonan 20:35.
TEKSTO PRINSIPAL: "E Kreador di shelu i tera, laman i tur loke tin den nan; Kende ta warda berdat
pa semper; Kende ta ehekuta hustisia pa e opriminan; Kende ta duna pan na esnan ku tin hamber.
Señor ta pone e prezonan den libertat; Señor ta habri wowo di e siegunan; Señor ta lanta esnan ku ta
abati; Señor ta stima e hustunan; Señor ta protehá e stranheronan; E ta sostene werfano i biuda"
(Salmo 146:6-9).
Hopi ananan pasá, riba un dia hopi friu na New York, un mucha hòmber di 10 aña tabata para
temblando pia abou ta wak dor di shokes di un sapateria. Un señora a bin serka e mucha i a puntr'e di
kon e tabata wak asina serio dor di e bentana; el a bisa ku el a pidi Dios manda un par di sapatu p'e.
E señora e kohe e mucha su man tene i a drenta e tienda kune. El a pidi e doño dje pakus pa bin ku seis
par di meña. Tambe el a pidi un kònchi di awa i un serbete. Mientras ku e tabata hiba e mucha na e
parti patras di e tienda, e señora aki a kita su hantskunnan, el a laba e pianan di e mucha i a seka nan
ku e serbete. Doño di e tienda a bini bek ku e meñanan. E señora a kohe un set di e menanan i a bisti
e mucha kune, i el a kumpra un sapatu p'e. El a karisia e mucha riba su kabes i a puntr'e si e tabata
sinti mas mihó awor. Ora ku e señora a bira pa e bai, e mucha a kohe su man tene i a puntra ku awa
na wowo: "Abo ta e kasa di Dios?"
E mucha ei a papia mas berdat di loke e mes tabata realisá. Dios Su iglesia ta Su bruit, su kasa. Su
karakter ta keda ekspresa den e teksto prinsipal di e les aki. Komo miembronan renoba di Su iglesia
nos tin ku refleha e karakter ei. Si di berdat nos ta di djE, apashona nos lo kuida i yuda e pobernan i
esnan desampara.
Traha e les aki pa sabat 16 di yuli.
Djadumingu, 10 yuli
KARAKTERISTIKANAN DI DIOS SU PUEBLO
For di prinsipio, hustisia sosial tabata un parti enfátiko di Dios Su leinan i Su ideal pa Su pueblo.
Hustisia sosial ta Dios Su proposito original pa konvivensia: un mundu kaminda ta supli nesesidatnan
básiko, un mundu kaminda hende ta prosperá i pas ta reina.
Lesa e siguiente versikulonan i resumi kiko nan ta bisa di miserikòrdia i hustisia, di loke 'hustisia
sosial' ta wordu yamá. Eksodo 22:21-23; 23:2-9; Levitiko 19:10; Proverbionan 14:31; 29:7.
Miserikòrdia i hustisia ta bini espesialmente dilanti den e leinan di sabat ku Dios a dune na Israel.
Dios a duna tres sorto di sabat.
Kon por mira miserikòrdia i hustisia den kada un di e sabatnan aki? Eksodo 20:8-10; 23:10, 11;
Levitiko 25:8-55.
1. E instrukshonnan pa warda sabat di shete dia ta ensera entre otro, oportunidat pa ofrese igual
posibilidat pa tur hende deskansá, inkluyendo krianan, animalnan òf stranheronan.
2. Kada shete aña tabata e aña sabatiko pa kansela debenan, pa kuida pa esnan pober i pa libere
katibunan. Dios a siña Su pueblo pa inklui e bestianan tambe den e bentahanan di e aña sabatiko
(Levitiko 25:6, 7).
3.
E aña di hubileo tabata den e di sinkuenta aña, despues di shete aña sabatiko.
Propiedatnan ku a kumpra mester a debolbe bek na a doño original; tabata kansela
(pordona) tur debe; mester a laga prisoneronan i katibunan bai liber. E aña di hubileo
tabata pa hasi tur pareu den sosiedat, tabata oportunidat pa duna tur hende chens pa
kuminsa di nobo. Esaki tabata pa "evitá ekstremonan di rikesa òf pobresa" (Ellen G. White,
The Ministry of Healing, p. 185).
Djaluna, 11 yüli
PREOKUPASHONNAN UNIVERSAL
Lesa Genesis 2:1-3. Kiko esaki ta konta nos di e universalidat di sabat?
Si di berdat nos ta warda sabat, nos lo no keda kontentu solamente ku nos mes deskanso,
liberashon i al final restourashon den e tera nobo. Sabat ta konta nos ku Dios ta Kreador i dunadó
di deskanso na tur hende ku ta biba riba e tera aki. E universalidat di deskanso di sabat ta enserá
un kolektividat ku nos ta komparti ku otronan, riku òf pober.
Manera nos a mira ayera, e preokupashon pa hustisia sosial ta bai tambe for di e sabatnan di tur
siman na e ananan sabatiko i e aña di hubileo. E prinsipionan tras di e tres sabatnan manera e ta
deskribi den levitiko 23 i 25, ta vigente tambe pa kristiannan. Pa tur eternidat sabat lo mustra bek
na e kreashon, meskos ku e krus i e tera nobo. E lo fortalese nos relashon ku nos Kreador i
Salbador bondadoso, i trese nos mas serka di esnan ku E Mes ta stima asina hopi—hendenan ku
tin hopi nesesidat, ku ta pober òf ta sufri.
Ounke e aña sabatiko i e aña di hubileo ta laga nos mira algun prinsipionan eterno, esaki no ta
nifika ku aktualmente nos tin ku selebrá e fiestanan aki literalmente. Diferente for di e sabat ku a
keda stablese den un mundu perfekto sin piká, e fiestanan menshona ta parti di e sabatnan
seremonial ku ta un 'sombra di loke mester a bini' (Kolosensenan 2:16, 17). E fiestanan aki tabata
mustra padilanti na e sakrifisio di Hesus i nan a kaba ku Su morto na krus. E sabatnan seremonial
aki ta mustra na un prinsipio ku tin relashon ku e echo kon nos mester trata otro hende,
espesialmente esnan ku ta desampara. Komo un pueblo libera Israel tabatin e obligashon di ta un
lus pa mundu, i mustra Dios Su miserikordia na otronan sin hasi distinshon. Ku gradisimentu nan
mester a representá Dios Su karakter na esnan ku no tabata konosE.
Lesa Amos 8:4-7. Kiko tabata pasando akinan, i kon nos por sigurá ku nos, den nos trato ku
otronan, no ta kulpabel di mes un problema? Ki nifikashon bo ta mira, segun e konteksto, den e
palabranan: 'Di berdat, nunka lo Mi no lubida ningun di nan echonan?' (Amos 8:7).
Djamars, 12 yüli
UN BOS PROFETIKO
'Habri bo boka pa e mudo, pa derecho di tur esnan desafortuná. Habri bo boka, huzga ku hustisia
i defende derecho di e pober i di hende den nesesidat' (Proverbionan 31:8, 9). Kon nos ta
kompronde e prinsipionan aki, i kon nos por apliká nan den nos tempu?
Te asina leu den e siman aki nos a mira ku Dios ta deseá pa e karakteristikanan di miserikòrdia i
hustisia keda demostra den komportashon di Su pueblo. E profetanan Hebreo tabata papia hopi
biaha na lugá di esnan desampare i tabata yama Dios Su pueblo na arepentimentu, pasobra no
tabata kuida bon pa esnan pober i oprimi. Pa Dios, adorashon berdadero tin di hasi ku
preokupashon sinsero pa otro hende.
18
Lesa Isaias 1:13-17. Kiko e deklarashon aki ta bisa di Dios Su punto di bista di loke ta
adorashon berdadero? Kiko e versikulonan aki ta bisa nos awor? Kon nos por pone nan na
praktika den nos bida?
Ounke hopi profeta den Testament Bieu tabata mustra padilanti na susesonan benidero, mas aya
di nan mes tempu, nan tabata espesialmente enfoka riba reforma spiritual i moral i prestashon di
servisio desinteresa presente. E stem profetiko di Dios Su sirbidonan tabata resoná mas duru ora
Su pueblo tabata hasi nan maksimo esfuerso pa ador'E, pero nan no tabata refleha Dios Su
preokupashon pa sufrimentu di hende rònt di nan. Kreyentenan ku ta hopi eksita pa adora' Dios, i
no tin tempu pa yuda esnan desampara, no ta refleha Dios bon. Salmo 82:3 Isaias 1:17
Kiko ta nifika pa bo ku 'adorashon berdadero' ta pa kuida i stima hende ku ta den
problema?
Djarason, 13 yüli
UN STEM PROFETIKO (kontinuashon)
Isaias 58 ta duna un mensahe profetiko espesial di amonestashon i speransa na Dios Su pueblo
den tempu di Isaias. E por ta aplikabel pa nos tambe awendia.
Lesa Isaias 58:1, 2. Kon Dios ta deskribi esnan ku E ta papiando kune, despues di anunsia
ku E ta rabiá riba Su pueblo?
Ounke nos no sabi presis ki 'zonido di stem' eksakto ta wòrdu usa akinan, ta keda kla si ku Señor
ta husga nan deboshon eksterior, i ta konsider'e komo algu inkreibel. E vershon NBV di Beibel ta
tradusi'e asin'aki: 'Ta berdat, nan ta buska Mi dia tras dia, yen di anhelo pa sabi kiko Mi ta desea,
manera un pueblo stranhero ku ta biba hustu i no ta neglisha derecho di su diosnan. I nan ta pidi
pa Mi instrukshonnan hustu i ta anhela pa Dios ta serka nan'. (Isaias 58:2).
Lesa Isaias 58:3-14. Kiko mas Señor ta bisa na e hendenan aki, di loke ta robes ku nan
ritonan religioso (den e kaso aki yunamentu)? Kiko ta mas importante akinan?
Ta esensial pa realisa ku adorashon por ta dirigi riba e persona mes: Señor, hasi esaki pa mi i
hasi esaya pa mi. Naturalmente, tin un tempu i lugá pa wak na Señor pa nos mes nesesidatnan
personal, pero loke Señor ta bisando akinan ta ku adorashon berdadero ta ensera tambe pa bira
kara i wak na esnan ku tin hamber, na esnan oprimi, i na esnan ku ta pober. E aspekto asombroso
di esaki ta ku ora sirbi otronan, esaki no ta bendishona solamente esnan ku ta risibi yudansa, pero
tambe esnan ku ta ofresiendo ayudo. Lesa mas aleu loke e tekstonan ta bisa di loke ta pasa ku e
hendenan ku yuda otro hende. Ora yuda otronan, nos mes ta wòrdu bendishona. Ta ken na sierto
punto no a eksperensia realidat di e promesanan aki di Dios? Ta ken no a yega di mira e goso, i
satisfakshon i speransa ku esnan ku yuda otronan ta eksperensia, kendenan no por yuda nan
mes kurpa. Ta duru imaginá un otro forma mas miho, kon nos por refleha Kristu Su imagen na a
mundu rònt di nos.
Lesa Echonan 20:35. Kon abo mes a eksperensia realidat di e palabranan aki ora bo a yuda
un otro prohimo?
Djaweps, 14 yüli
PODER DI BONDAT
Ta den poseshon di e berdat, pa bunita ku e por ta, no ta sufisiente. Den Isaias 58 Dios Su pueblo
ta masha dediká mes ku nan seremonianan i praktikanan religioso, pero suak den praktika nan fe.
Meskos ku e pueblo den e tempu aya, Dios ta yama Su iglesia awe pa bira un forsa pa hasi loke
ta korekto. Esaki ta un èko di yamada di e profetanan for di Testament Bieu, pa demostrá Dios Su
karakter korektamente.
Lesa e siguiente tekstonan. Kon nos por lucha komo iglesia lokal i mundial pa hasi loke a
yama nos pa kumpli kune?
Salmo 82:3
Isaias 1:17
E ehempel aki ta papia di un iglesia den un area urbano. Na aña 2011 pastor di e misa aki a yama
e kongregashon den forma profetiko pa nan tuma nan tarea den nan stat na serio. El a bisa,
'Kristiannan mester stop ku e marcha di morto aki!' Refiriendo na e relato bibliko kaminda Hesus
ta para un proseshon funeral di yu hòmber di e biuda di Nain (Lukas 7:11-17), el a splika ku iglesia
no por keda sinta ku flohera, sin hasi nada den nan komunidat, mientras ku violensia ta
oumentando kada dia den kaya. El a puntra na su oyentenan: 'Nos ta simplemente un iglesia ku ta
sinta wak Dios aktua?' Ora nos puntra Dios: 'Pakiko Bo ta laga sufrimentu reina?', Dios ta puntra
nos mes: 'Pakiko abo ta permiti sufrimentu sigui?'
For di e tempu ei e iglesia aki ta masha aktivo den obra sosial pa yuda edifika sosiedat. Shete aña
largu koro di e iglesia aki tabata sali bai den kayanan di nan besindario. Nan tabata kanta, parti
foyetonan i ofrese servisionan di iglesia na esnan ku tabata den nesesidat. For di e kontakto aki
ku nan besindario, a iglesia aki a bin yuda diferente hende desampara. Dor di varios programanan
e iglesia aki a hasi un gran diferensia den e besindario ei.
E iglesia aki ta djis ún ehempel di e hopi formanan kon nos komo iglesia por ta un forsa di sirbishi i
kurashon den nos besindario.
Ta kiko bo iglesia por hasi pa yuda hende den nesesidat den boso besindario?
Djabierne, 15 yüli
PA MAS ESTUDIO:
Den henter Testament Bieu nos ta haña modelonan di hustisia i miserikordia. Wak por ehempel
na Deuteronomio 24:10-22. Paga tinu riba e instrukshonnan espesifiko den e ehempelnan aki.
Den forma kla nos por mira Señor Su preokupashon pa esnan ku ta pober, pa e obreronan i
hendenan ku tin problema finansiero. No ta ekspresa e preokupashon aki pa esnan desampara
solamente den palabranan bunita. Por mire tambe ekspresa den instrukshonnan praktiko den kiko
hasi i kiko no hasi den sirkunstansianan espesifiko, manera den situashon ora ku un persona tin
debe pa paga. E ehempelnan aki tabata muchu importante pa pensa ku nan t'ei pa solamente
hala atenshon na hustisia i bondat. Ta remarkabel kon Señor ta mustra nan bek na a situashon
kon nan mes tabata antes, tempu nan mes tabata forma parti di a grupo desampara. 'Kòrda kon
boso mes tabata katibu na Egipto. Pesei Mi ta ordena bo hasi e kos aki.' (Deuteronomio 24:22).
Komo kristian, no importá kua ta nos situashon finansiero, lagá nos keda korda semper e
miserikordia i bondat inmeresi ku Dios a duna nos. I di loke nos tin awor, pa grasia di Dios, laga
nos ta dispuesto pa duna un man i yuda esnan ku tin mester di nos yudansa. (Efesionan 3:19;
Kolosensenan 2:10).
PREGUNTANAN PA DISKUSHON:
1.
Den e di kuater mandamentu ta bisa ku sirbidonan mester deskanse riba dia di
sabat. Kon esaki ta revelá e idea di igualdat di tur hende dilanti Señor? Kon esaki ta yuda
nos kompronde kon nos mester trata hendenan ku ta traha pa nos, òf ku nos ta
responsabel p'e? Kiko e oferta di Hesus tin di hasi ku igualdat di tur hende dilanti Dios?
2.
Ora ku e spiritu di Kristu bira nos spiritu, i Su obranan bira nos obranan, nos lo ta
kapas di retene loke profeta Isaias ta bisa den Isaias 58:6: "No ta esaki ta e yunamentu ku
Mi ta ta skohe: pa kita e kadenanan di maldat, pa los kabuyanan di e yugo, i pa duna
libertat na esnan oprimi i kibra tur yugo?" Kon bo por deskubri kiko 'e hendenan ku ta
sufriendo tin mester', i kon bo por yuda nan 'tin konfiansa den nan mes dor di komparti e
kosnan bon ku Dios a duna bo ku nan'? (Ellen G. White, den Pacific Union Recorder, Yuli
21, 1904).
Sabat 16 yuli,les pa hoben
Titulo
Kon bo ta presentá bo mes?
Pregunta inisial
Kua historia tokante liberashon bo a kontra siman ku a pasa? Komparti ku e grupo.
Lesa huntu Isaias 58:6-14
Pregunta
Ta posibel figura bo mes kon lo ta pa no tin kas i no tin sen pa kumpra kuminda? Diskuti e punto
aki ku otro.
Inspirashon
'Señor lo duna forsa na bo wesunan; lo bo ta manera un hofi bon muha.' (Isaias 58:11, Beibel
Santu) Trata e teksto
Djadumingu: versikulo 6-7. Na ki manera bo por hasi Dios un plaser? Kon bo por laga mira ki sorto
di hende bo ta? Kon loke tin pará den e tekstonan aki ta relashona ku bai misa? Kiko ta yuna?
Dikon e eskritor ta huza e ehempel aki? Diskuti e punto aki ku otro.
•
Djaluna: versikulo 8-10. bo lus ta referi na e lus ku ta bini di Dios.
Lesa Isaias 10:17, 9:22 vs, 42:6; 49:6. Kiko bo ta nota na e 'lus'. Dikon nos lus ta bin di
Dios? Ki punto di bista lo bo mester tin komo hende? Diskuti e punto aki ku otro.
•
Djamars: versikulo 11-12. Hende lo dunabo nòmber ora bo ta hasi tur e kosnan aki.
Kiko esei lo ta nifiká? Bo por duna un ehempel? Diskuti e punto aki ku otro.
•
Djarason: versikulo 13-14. E eskritor ta bai awor na e Sabat. E aktitut basiko ku bo
tin pa otronan (wak Isaias 58:6-12) mester penetrá den tur kulto na Dios. Prinispionan
basiko di fe mester tin efekto riba kada parti di e fe. Sabat lo por bira un rito inaseptabel?
Kiko lo bo mester kambia e orei? Diskuti e punto aki ku otro.
Aplikashon
•
Djaweps. Kua partinan di e servisio di Iglesia ta rutina i kua bo ta gusta? Ki efekto e
partinan ku bo ta gusta tin riba bo? Splika dikon.
•
Djabierne. Te kon leu nos mes ta kulpabel na suprimi nos prohimo? Esaki tambe tin
di hasi ku Fair Trade? Diskuti e punto aki ku otro.
•
Sabat. Bo por pensa un ehempel di un hende ku tin hopi atenshon pa otronan debi
na su fe den Dios? Ki efekto e ehempel aki tabatin riba bo? Bo por imita nan ehempel e
siman aki?
Tarea
Wak un hende den bo lglesia ku bo ta haña un ehempel. Bai papia ku e persona ei i puntra dikon
e ta trata asina ku su fe. Purba na siña algu i aplike den bo bidá e siman aki,