Bon biní!

Bon biní!
Na sierto hotèl i resort bo ta haña un ‘Karta di bon biní’ ora bo drenta bo kamber òf apartamento.
Gerensia ta yamabo bon biní i ta splika kiko ta e partikularidat- i spesialidatnan dje hotèl. Tambe nan
ta indiká bo kiko mester i ta risibí atenshon spesial. Tin biaha bo ta haña un rekorido den e hotèl i
nan sa bo nòmber mesora. Den poko palabra, bo ta bon biní!
Kada empresa i kada fundashon òf korporashon lo mester traha un karta di bon biní asina pa nan
empleadonan i tambe pa nan atministradó- i supervisornan. Kiko mester tin pará den e karta? Na
promé lugá algu tokante orígen i historia di e organisashon. Despues un introdukshon di gerensia i di
e (otro) miembronan di direktiva/hunta di supervishon. Mester trata e parti di vishon i mishon
tambe. Banda di esei mester duna un bista di e tarea- i responsabilidatnan di direktiva/hunta di
supervishon. Naturalmente lo deskribí e reglamento-, statuto- i obligashonnan tambe.
Preferiblemente uza potrèt, dokumento i relato. Duna splikashon tokante e dilemanan i e
skohensianan ku mester a hasi den transkurso di aña, deskribí kon a reakshoná riba susesonan grandi
den pasado i riba susesonan chikí den e pais. Kosnan chistoso for di den pasado tambe por haña un
lugá i eventualmente kosnan doloroso tambe. Kompartí nan ku koleganan nobo. Lo bo no gusta pa
haña un dokumento asina na e empresa kaminda bo ta traha?
Sigur pa supervisornan, pa komisario-i miembronan di Hunta di Supervishon, un tipo di
informashon asina no ta solamente agradabel, pero asta krusial tambe. T’asina ku e supervisornan akí
ta den un akto di ekilibrio. Nan ta hunga un papel importante den e organisashon, pero na mes
momentu nan ta agentenan eksterno. Esaki ta nan balor agregá tambe. Dor di esaki nan por husga
riba distansia si gerensia ta aktua na un manera inteligente. Pa hopi desishon i skohensia di
supervisornan ta nesesario pa komprondé unda rais di e organisashon ta sintá. Kiko a drenta e
hendenan ku a lanta e empresa òf fundashon? Bo mester sa kiko a inspirá nan. Bo mester sa kon nan
ekspreshonnan tabata. Tabatin alegria òf tabatin mas tantu kara di bòm? Kon e aktitut básiko tabata
pa ku e personal? E trahadónan ta inspirá? Tin un sintimentu di malkontentu? Konosementu di esaki
ta hasi komprondementu posibel i komprondementu pa un bon supervisor ta kondishon pa bon
konseho. Kon bo por komprondé insidentenan den un empresa sin konosementu profundo di alma
di e empresa? Esei ta imposibel. Si bo tin e konosementu profundo ei, e ora ei bo tin un mihó
konteksto pa hunga bo papel supervisorio, tantu den kaso ku bo mester para riba brek komo den
kaso ku bo mester hustamente duna mas espasio. Ke men, dal bai traha e karta di bon biní ei!
1