Transformadó

Transformadó
Bo ta rekonosé e mekanismo ku e mesun patronchinan di bida i kustumbernan den un
sierto fase di bo bida por ta hopi funshonal, pero despues hustamente por bai funshoná
komo blokeo? Den sikologia tin un kantidat di ehèmpel di esaki. Un mucha ku no ta sinti
su mes seif, por resistí kontra esaki dor di komportashon agresivo. Lo kontrali tambe por
: e mucha bou di menasa ta hustamente apartá su mes kompletamente.
Na momentu di menasa, tur dos reakshon ta efektivo pa protehá bo kontra e menasa.
Mas lat den bida un aktitut agresivo òf modestia ku entretantu bo a atkerí por bira un
estorbo pa forma relashonnan saludabel. Un reakshon primario ku un tempu den pasado
tabata efektivo, di e manera ei den presente ta bira un blokeo pa desaroyo adishonal.
Antisipá riba kambio
Den un empresa esaki no ta otro. Den periodonan di kresementu i prosperidat por lanta
un aktitut mas lòs relashoná ku hasimentu di gastu. Esaki ta bon tambe, pasó kresementu
hopi biaha ta eksigí invershonnan drástiko. Seguidamente ekonómikamente ta bai ménos
bon, pero e aktitut mas lòs ei no ta kambia. E ora ei e empresa por hañ’é diripiente hopi
lihé den problemanan finansiero. For di esaki por saka lèsnan pa tur stakeholder den un
empresa.
Bon management ta eksigí e kapasidat pa detektá kambionan rondó di bo hopi lihé. E ta
eksigí fleksibilidat. Bo mester riska laga lòs for di sierto patronchi i kustumber ku a dal
pega riba bo i transformá pa patronchinan nobo. Aki tin un tarea importante pa e Hunta
di Komisario. Dor di nan distansia mas grandi for di e empresa, komisarionan hopi biaha
ta kapas pa detektá kambionan den bisindario di e empresa mas lihé ku gerensia. E ora ei
nan por yuda gerensia pa realisá e nesesidat pa kambia di rumbo òf pa kambia e maneho.
For di e zona di komfortabilidat
E akshonista tambe mester ta konsiente di un ambiente ku ta kambia. E tambe tin ku
adaptá su komportashon na esaki. Meskos ta konta pa e empleadonan. Bai ku penshun
ku bo sesenta aña lo no por mas si tur hende biba un averahe di dies aña mas largu. Pues
e ora ei bo mester traha mas largu tambe. Derechi- i obligashonnan nunka no ta
apsoluto. Ku tempu nan ta transformá den formanan nobo. Esaki ta eksigí fleksibilidat di
tur hende. Tin biaha esaki ta fèrfelu. Generalmente hende ta konservativo. Bo ta preferá
pa kosnan no kambia muchu. Hende ta apresiá nan zona di komfortabilidat. Bo no tin
mashá gana di bandoná esaki.
Un bon ehèmpel di governance di NVnan di gobièrnu ta e transformashon di loke un
tempu tabata servisionan di gobièrnu (konstrukshon di bibienda, transporte públiko,
suministro di energia, telekomunikashon, etc.) den NVnan di gobièrnu i fundashonnan di
gobièrnu. E konosido struktura herárkiko di un departamento i e relashon top-down
korespondiente di Minister pa Direktor òf SG i kontinuá bai abou asina, no ta aplikabel
mas. Loke lo sòru pa frikshon ta si e akshonista sigui kere ku e ta na kabes di e empresa
(ku entretantu a independisá) komosifuera e empresa ei ta un servisio òf departamento.
Pues un minister tambe mester kustumá ku e no por duna direktor di un empresa di
gobièrnu un tarea. E komisarionan tampoko e no por kontrolá, sino ta ku e
1
posibilidatnan legal ku kada akshonista tin. E komisarionan na nan turno mester kustumá
tambe ku nan no ta manda den e empresa. Meskos ta konta pa lidernan polítiko. Nan ta
’repartí’ e puestonan importante den huntanan di komisario di NVnan di gobièrnu i
direktivanan di fundashonnan. Tin biaha nan ta pensa ku e kompatriotanan di partido ku
e ora ei a atkerí nan posishon nobo ‘danki na partido’, mester sigui e instrukshonnan na
nòmber di e partido den ehersementu di nan trabou di supervishon. Pues nò. Den kaso
di kompanianan anónimo i fundashonnan tin otro reglanan di governance ku serka
servisio-òf departamentonan òf den partidonan polítiko. Pues den e proseso di
independisashon akí, e berdadero lider polítiko ta resultá di ta transformadó, no
solamente di otronan, pero tambe i espesialmente di su mes. E sa kon pa adaptá su
komportashon na e sirkunstansianan nobo. Si bo hasi esaki, e empresa ta floresé, si bo no
hasié, e ta sufri daño. E pagadó di impuesto ta sangra.
Bo tin pregunta tokante di corporate governance? Sea asina bon di mand’é na
governance@ekvandoorne.com i ken sa, bo pregunta lo por wòrdu trata den nos
próksimo kolumna!
2