Regla, regla i mas regla

Regla, regla i mas regla
Kasi tur hende sa ku un NV o BV (i un fundashon tambe) tin statüt. No opstante, ta notabel ku den
práktika komisario- i hasta miembronan di gerensia tin biaha no ta mashá bon na altura di loke ta
pará den statüt di nan propio organisashon. Bèrdat ku no por konsiderá statütnan komo prototipo di
literatura agradabel, ku bo ta bolbe sinta lesa anochi pa prèt, promé ku bo bai drumi. Den hopi kaso
nan lenguahe ta inkomprensibel. Ademas, pa por komprondé debidamente nifikashon di mashá
klóusula, mester di un aklarashon dor di un notario ku konosementu di e materia òf un otro hurista.
Wesu di lomba
No opstante, un komisario no por ehersé su tarea- i responsabilidatnan manera debe ser, si e no ta
mashá bon na altura di loke ta pará den e statütnan. Prueba es ku statütnan ta forma wesu di lomba
di un kompania. Den statüt ta pará kiko meta di e empresa ta, kua ta kompetensianan di e diferente
órganonan (gerensia, hunta di komisario, akshonistanan), ken tin ki responsabilidat i kua ta e
relashon entre e diferente órganonan. Lei ta stipulá ademas, ku desishonnan ku gerensia i/o hunta di
komisario tuma, pero ku ta en pugna ku e statütnan, ta nulo o ku por anulá nan.
Herarkia
Frekuentemente ta surgi e pregunta, kiko ta mas importante, loke ta pará den lei o loke ta pará den e
statütnan. E kontesta ta simpel. Na tur momento lei ta prevalesé. Esei ta nifiká ku un klóusula den
statütnan ku ta en pugna ku lei, ta nulo. Lei di Kòrsou ta preskribí, ku un asina yamá NV "grandi"
(esta ku mas di 20 trahadó, ku mas di 5 mion florin antiano na aktivo i un volúmen di benta di mas
di 10 mion), mester tin un hunta di komisario. Si statüt di un NV asina ta stipulá ku un hunta di
komisario no ta nesesario, e klóusula ei ta nulo i no eksistente. Hopi hunta di komisario i gerensia ta
instituí (ademas) un reglamento pa e hunta di komisario i/o un reglamento di gerensia. Den e
reglamento ta elaborá mas detayadamente i ta regla sierto asuntunan. Na nan turno e reglamentonan
akí ta supordiná na e statütnan (konsekuentemente tambe na lei). Si un reglamento asina tin un
klóusula ku ta en pugna ku e statütnan, no por apliká e klóusula i e ta nulo, respektivamente. Por
papia antó di un herarkia, segun kua reglanan legal semper bai ta prevalesé riba reglanan statutario, i
reglanan statutario semper bai ta prevalesé riba reglamentonan.
Bo tin pregunta tokante di corporate governance? Sea asina bon di mand’é na
governance@ekvandoorne.com i ken sa, bo pregunta lo por wòrdu trata den nos próksimo
kolumna!
1