Pafó di lei

Pafó di lei
Lei ta konta pa tur hende. Aloménos esei lo bo pensa. Tòg esei no ta bèrdat. Lei no ta konta meskos
pa tur hende kada bes. Tuma por ehèmpel e Ordenansa Nashonal di Corporate Governance
(“LvCG”). Esaki no ta konta pa entidatnan di gobièrnu manera NV- i fundashonnan di gobièrnu
manera (Aqualectra, Curoil, FKP etc).
E por ta zona poko straño, pero e asuntu ta asin’akí. E LvCG ta dirigí su mes na Pais Kòrsou den su
kapasidat di stakeholder den un NV òf fundashon. E LvCG no ta dirigí su mes na entidatnan di
gobièrnu (manera un NV, por ehèmpel Curoil mes), pero na e akshonista. Komo akshonista, Pais
mes mester tuma desishonnan regularmente. Pensa akí riba desishonnan tokante nombramentu i
retiro di atministradó-òf komisarionan òf riba desishonnan tokante partisipashon den otro
kompanianan. E LvCG ta regla kon Pais mester ehersé su derechinan di akshonista den tipo di
kasonan asina.
Obligashonnan LvCG pa Pais komo akshonista
Akinan a inkorporá kuater elemento importante den e LvCG. 1. Pais mester traha un Kódigo di
Corporate Governance. 2. Komo akshonista, Pais mester sòru ku ta implementá e Kódigo di
Corporate Governance den NVnan di gobièrnu. 3. Mester nombra un Konsehero di Corporate
Governance (“Konsehero di CG”). 4. Pa sierto desishonnan di akshonista, Pais mester pidi pèrmit
delantá di e Konsehero di Corporate Governance.
E kompania mes ta para kompletamente pafó di tur esakinan. E obligashonnan menshoná
anteriormente ta sosegá solamente riba Pais den su ròl di akshonista. Esaki ta e motibu tambe ku no
gerensia sino e akshonista, Pais ta presentá un konseho tokante nombramentu òf retiro di un
atministradó na e Konsehero di CG. Bon mirá, e Konsehero di CG mes no tin nada di ber ku e NV
di gobièrnu.
Konsekuensia
Loke a menshoná anteriormente tin konsekuensianan importante. T’asina ku for di esaki por konkluí
ku e Kódigo di Corporate Governance (“Kódigo di CG”) tampoko no ta konta sin mas pa tur
entidat di gobièrnu. E Kódigo di CG ta konta pa un NV di gobièrnu, solamente ora Pais komo
akshonista a kambia e statutonan di tal manera ku eiden ta stipulá ku e Kódigo di CG ta aplikabel
(mira punto 2 mas ariba). Pa sierto entidat di gobièrnu esaki no a sosodé ainda. E statutonan di UTS
por ehèmpel ta data di 1995. Den e statutonan ei no tin niun stipulashon tokante e Kódigo di CG.
Esaki no ta aplikabel tampoko e ora ei den UTS. Gerensia i Hunta di Komisario di UTS a disidí sí pa
aktua boluntariamente di akuerdo ku e Kódigo di CG. Sinembargo esaki no ta riba niun base
statutario i/òf legal.
Loke a menshoná anteriormente tin mas konsekuensia ainda. Ora Pais tin ménos ku mitar di e
akshonnan den un NV, Pais no por fòrsa pa e Kódigo di CG bira aplikabel den e NV ei. Di pursi, si
e otro akshonista (mayoritario) no ta deseá esaki, no ta kambia e statutonan. Aparte di esei, den tal
kaso e LvCG si ta keda konta pa Pais komo akshonista (mayoritario) den e NV ei. Si por ehèmpel
mester manda un komisario kas, e ora ei ta e AvA mester tuma un desishon riba esaki. Den e
ehèmpel akí, esun akshonista (Pais), promé ku e por vota, lo mester pidi un konseho delantá serka e
Konsehero di CG, miéntras ku e otro akshonista por vota manera e haña ta bon. Esaki ta nifiká ku si
Pais ke pasa pa dunamentu di retiro i e otro akshonista (mayoritario) no ke esaki, e ora ei esaki no ta
sosodé tampoko.
1
Fundashonnan
Den un fundashon, kosnan ta mas kompliká ainda. Un fundashon no tin akshonista. E LvCG ta
determiná ki ora por papia di un fundashon den e sentido di e ordenansa nashonal akí (artíkulo 1).
Un fundashon di gobièrnu ta un fundashon kaminda Pais tin e derechi pa nombra un òf mas
miembro di direktiva òf tin e outoridat pa kambia e statutonan. Si Pais tin solamente un minoria
den e direktiva, e ora ei por implementá e LvCG i e Kódigo di CG den tal fundashon si e otro
miembronan di direktiva tambe ta partidario di esaki. Si e otro miembronan di direktiva, no ke e
LvGC i e Kódigo di CG, e ora ei esaki no ta bin den e fundashon. Asina simpel e ta. Pues e lei ei no
ta konta pa e fundashon ei.
Bo tin pregunta tokante di corporate governance? Sea asina bon di mand’é na
governance@ekvandoorne.com i ken sa, bo pregunta lo por wòrdu trata den nos próksimo
kolumna!
2